Aasaanerani sikumi atuartitsineq ukiormanna nangeqqinneqarpoq

Joint Committeep tapersersugaanik nunatsinni ilinniarnertuunngorniarfinni ilinniartut arfineq-pingasut peqatititik/ilutitik Damark-imiit USA-millu pisut ilagalugit Kangerlussuarmi pinngortitamik ilisimasassiornermik atuarput.
Allattoq Carla Davidsen
juulip 08-at 2013 05:30

Ilinniagaqartut 16-it immikkut ittumik Kangerlussuarmi aasaanerani feriarput, tassani sammineqarput pinngortitalerinermut tunngasunik atuarnerit, soorlu nunalerineq, uumassusilerineq, fysik aamma kemi.

Inuusuttut taakkua USA-mi ilinniarnertuunngorniarfinni High Schools-ini Danmarkimi nunatsinnilu ilinniarnertuunngorniarfiini ilinniartuupput.

Ilinniarnertuunngorniat arfineq-pingasut nunatsinneersut Aasianni, Sisimiuni Nuummilu ilinniarnertuunngorniarfinni ilinniagaqartuupput.

Kangerlussuarmi aasaanerani atuartitsineq juunip ulluisa 29-anni aallartippoq juulillu ulluisa qulingata tungaanut atuassapput, Kangerlussuarmiinnermini ilisimatuut sulinerannik malinaassapput, soorluttaaq nammineq ilisimatuussutsikkut sulianik suliaqassallutik.

Aasaanerani atuartitsineq kalaallinit suliniuteqarnikkut piviusunngorpoq.

Inuusuttut pinngortitamik ilisimatusarnissamut soqutiginnilernissaat siunertaavoq tuluttullu pisinnaasaat annertusarneqarniassammat.

Inuusuttut aasaanerani atuartinneqarnerat inuusuttoqatinik USA-miittunik Danmarkimiittunillu attaveqalernissamik periarfissiissaaq, tassuunatigut nunani allani  ilinniartitaaneq aamma paasisaqarfigineqassalluni.

Taamatut attaveqalerneq ilinniakkap nunani allani nanginneqarsinaaneranik periarfissiissaaq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk