Aappariit Ilulissaneersut Nersornaatinnattut
Aappariit taakkua ilaqutariittut ingerlatamik suliffeqarfimmi, aalisarnermi inuussutissarsiummut kiisalu najukkami inuiaqatigiinnut pingaarutilimmik ukiorpassuarni suliniuteqarsimanertik pillugu nersornaaserneqarput.
Marie Sandgreen ilaqutariittut ingerlatamik ineriartortitsineq eqqarsaatigalugu ilaqutariit ataqatigiinnerat ikorfartorniarlugu pinngitsoorneqarsinnaanngitsumik suliaqarsimanini pissutigalugu sølviusumik Nersornaaserneqarpoq.
Ilaqutariittut ingerlatamik suliffeqarfiuteqarnermi ataqatigiilluartuusariaqarnerup pingaaruteqassusaa Kim Kielsenip oqalugiarnermini erseqqissarpaa:
- Suliffeqarfimmik ilaqutariittut pigisamik ingerlatsilluassagaanni tunuliaqutaqarluarnissaq, sulerulunnissaq tapersersorneqarnissarlu pisariaqartut tamatta nalunngilarput. Angusat tamakku taamaallaat ataqatigiinnikkut allanillu pilliuteqartariaqartarluni sulerulunnikkut anguneqarsinnaapput.
Marie Sandgreenip suliffeqarfimmik, piffissap ingerlanerani ilaqutariippassuarnik suliffissaqartitsillunilu aningaasarsiortitsisumik, ineriartortitsinermi aalajangiisumik sulisimanerata pingaaruteqassusaa taassuma erseqqissarpaa.
Ilaqutariit suliffeqarfiutaannik pinngitsoorneqarsinnaanngitsumik ukiorpassuarni ineriartortitsisimanera tamatumalu inuiaqatigiinnut sunniutaata pingaaruteqarnera tunngavigalugit Nersornaammik sølviusumik nersornaaserneqarpoq.
Ineriartornermut tapersiisut
Gerth Sandgreen aalisarnermik inuussutissarsiuteqarnermi nersortarialimmik suliniuteqarsimanini ilaqutariippassuillu isertitaqarsinnaanissaannik qularnaarinnittumik ilaqutariinnit pigineqartumik ukiorpassuarni ingerlataqarsimanini pissutigalugit sølviusumik Nersornaaserneqarpoq.
Kim Kielsen oqalugiarnermini ilaatigut ima oqarpoq:
- Suliffeqarfimmik ilaqutariittut pigisamik ilaqutariippassuit sulinikkut isertitaqarsimanerannik qularnaarinnittumik illit nuliallu ukiorpassuarni ingerlatsisimavusi, nunattalu ineriartorneranut angisuumik tapersiisimallusi.
Gerth Sandgreen aalisarnermik inuussutissarsiummi ingerlaavartumik atugassaqarnikkut nikerarfiusumi naleqqussartuarluni ingerlatsivoq. Inuusuttullu aalisarnermik inuussutissarsiornermik ingerlatsilerlaat misilittakkaminik ukiut ingerlanerini avitseqatigalugillu ikorfartortarsimavai, sorluttaaq Ilulissani aalisakkeriviit inerisarneqarnerini tunniusseqataasarsimalluni.
Utoqqaliarsaaleriartornermini unnuisarfinnik pilersitsinikkut suliffeqarfiutini nunami suliassaqarfiusunik aamma annertusaavoq, tamatumani takornariaqarnikkut inuussutissarsiorneq suleqataaffigalugu.
Namminersorlutik Oqartussat nersornaasiuttagaat Nersornaat Namminersornerullutik Oqartussat ukiut qulinngortorsiorlugit nalliuttorsiornerannut atatillugu 1989-imi pilersinneqarpoq.
Saqqarmiu tunniunneqartassaaq inunnut maani innuttaasunut taamatullu danskinut aamma nunani allamiunut - immikkut nersortariaqarluinnartumik Kalaallit Nunaannut sullissisimasunut, suliaat inuiaqatigiinnut sullissineruppat, inuussutissarsiornermut, eqqumiitsuliornermut, ilisimatuussutsimut imaluunniit allamut tunngasuuppat assigiimmik.
