Aallaasersortoqareernerani inuit sisamat tigusarineqartut

Ilulissat eqqaani Taseraasani illuaqqani aserorterisoqarsimasoq, tillinniartoqarsimasoq illuaqqallu eqqaanni aallaammik eqqartoqarsimasoq politiit tusagassiuutinut nalunaaruteqarput.

Allattoq Kenneth Elkjær, Mads Pedersen

juunip 08-at 2017 13:54

Politiit Taseraasani illuaraqarfiusumi aallaasersortoqarneranik unnuaq nalunaarutigineqarsimapput.

Politiit nalunaartoqarnerata kingorna piffimmut ornigussimapput, tassanilu pinerluttut suli piffimmiittut naammattoorneqarsimallutik. Pinerluttut qoorortuumik imassalimmik tigummiarsimasut politiit oqaatigaat.

Piffimmi inuit sisamat tigusarineqarput, taakkunanilu marluk ukiukitsuullutik.

Tigusarinaqartut qoorortuumik, imigassamik kimittuumik aalakoornartulimmik kiisalu puiaasanik utertitassanik illuaqqani tillitaasimagunartunik arsaarneqarsimapput.

Politiit misissuinerisa takutippaat angut inuusuttoq imigassartorsimalluni angallammik Taseraasap tungaanut aqussimasoq. Taanna imigassartorsimatilluni aqussimasutut unnerluutigineqarpoq.

Inuit illuaqqani unnuisut aallaammik eqqartoqarnerata kingorna toqqissisimanngitsut politiit nalunaaruteqarput.

Qujanartumik inunnik ajoqusertoqarsimanngitsoq politiit oqaatigaat.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.