Aalisarnermik ingerlatseqatigiiffittaaq Inua Fisheries, illoqarfinni mikinerusuni siuarsaarusuttoq
Aalisarnermik ingerlatseqatigiiffik pilersinneqarpoq.
Inua Fisheries Greenland Jens Peter Larsenimit, Taatsiaq Møllerimit Karl Ingemannimillu pilersinneqarpoq.
Taakku pingasuullutik ingerlatseqatigiiffiup kalaallinik sapinngisamik amerlasuunik piginnittoqarnissaa siunertaraat.
Taatsiaq Møller ima oqarpoq.
- Tassanilu pissarsiarinikuuagut sineriak annertulaartorujussuaq, Kujataanit Qaqortoq Narsaq Ilulissakkut tikillugit, nunaqarfiit arlallit tassani aamma ilaallutik.
Ingerlatseqatigiiffik sumiiffinnit qulinit amerlanerusunit katillugit 56-inik piginnittoqalersimavoq, pisortaq paasissutissiivoq.
Pisassiissutinik qinnuteqartitsinermi ilaasut
Pisassiissutigineqartuni siullermi tunineqarnissaq siullertut siunertarineqarpoq, taannalu naalakkersuisut suliarileruttorpaat.
Ingerlatseqatigiiffik naapertorlugu, pisassiissutit niuerutigineqarsinnaasut nammineq pigisat (PNNP) pineqarput, tassaniippullu qalerallit 2.468,5 tonsit taavalu saarulliit 1.950 tonsit nataarnallu 166,6 tonsit aalisarneqarsinnaanerannut akuersissutit.
Ingerlatseqatigiiffik juulip 23-anni pilersinneqarpoq. Taamaammat qinnuteqarnissamut ulapingaatsiarsimallutik, Taatsiaq Møller oqarpoq.
- Piffissaq sivikinnikooqaaq piffissaliunneqarnikoq suliap tunniunneqarnissaanut, taannalu sukataangaarluta ingerlannikuuarput. Piffissaq sivikitsuaraararsuunikuuvoq, taava tassani inuit sapinngisamik katersorsinnaasagut sukkanerpaaq atorlugu katersornikuuagut.
- Kisianni arlaatigut soorunami uagutsinnut tunniunneqassappat Inua Fisheries Greenland ApS-imut, tassani suli kalaallinik piginneqataalersussanik soqutiginnittussanullu soorunami uagut ammatitsivugut.
Illoqarfiit minnerusut samminiarneqartut
Inua Fisheries Greenlandip Aasianni tunisassiorfiup inissisimaffissaatut annersaallunilu pingaarnerpaatut aallaqqaammut isigigaa, Taatsiaq Møllerip oqaatigaa.
- Taava siunissami takorluukkagut arlaqarput. Illoqarfiit mikinerusut, taakkua ukkakkusuppagut, soorlu eqqaasinnaasatsitut Narsaq, Paamiut.
- Assigiinngitsut tassa illoqarfiit ukkakkusuppagut suliffissaqartitsilluarusulluta taavalu suliffissanik pilersitserusulluta.
Inua Fisheriesip pilersinneqarnera ingerlatseqatigiiffinnut angisuunut taakkulu pisassiissutinik pissarsiniarlutik neqeroorutaannut akerliliissutitut isigineqarsinnaanngila?
- Inua Fisheriesip anguniagarinngilaa uku soorlu aningaasaatillit taakku kisimik ingerlatsissasut. Tassani anguniarneqarpoq kalaallit amerlasuut sapinngisamik piginneqataassasut, Taatsiaq Møller naggasiivoq.
