Aajuku Avannaa Arctic Gamesimi Nunatta unammisitassai

Arctic Sportsimi aamma Dene Gamesimi nuna tamakkerlugu sungiusaasut issittormiut unammiuaarnissaanni nutaami Avannaa Arctic Gamesimi Nunatta unammisitassaanik toqqaapput.
Arctic Sports naggueqatigiit inuit timersuutigaat Dene Games eqqillit inerisagarigaat. Taakku assigiissutigaat issittumi peqqarniissinnaasumi najugaqaannarsinnaajumalluni timikkut eqqarsartaatsikkullu piginnaasatigut sungiusaataagamik.
Ullutsinni timersuutit taakku sukisaarsaatitut aallunneqarput ukiorlu allortarlugu Arctic Winter Gamesimi unammissutaasarlutik. Maanna Avannaa Arctic Games aallartilerpoq Avannaata Kommunia aaqqissuisoralugu.
- Ilimagaara unamminerit pitsaassusaat Arctic Winter Gamesimisut qaffasitsigiumaartoq. Unammersuarneq nutaajuvoq. Taamaattumik ilimagaara nunat peqataasussat angusarissaarniarlutik pikkorinnersiukkanik aallartitsiumaartut, Arctic Sports Greenlandimi siulittaasoq Kim Rosing KNR-mut oqarpoq.
Amerlanerit peqataarusukkaluarput
Nunat peqataasussat tassaapput Alaska, Nunavik, Nunavut soorunami aamma Nunarput.
Nunat Arctic Winter Gamesimi peqataasartut soorlu Alberta aamma Nordvest territoriet maanna peqataanngillat.
- Martsimi Arctic Winter Gamesertuniikkatta malunnareerpoq Nunatsinnukarnissamut soqutiginnittoqartoq. Maanna Avannaata Kommunia aaqqissuisuuvoq taakkulu peqataasut amerlassusaat appasitsikkallarpaat, Kim Rosing oqarpoq.
Tamanna Avannaata Kommunianit uppernarsarneqarpoq, siullerpaamik aaqqissuunneranni amerlassutsit nakkutigiuminartut aallarniutigineqarusummata.
Arctic Sportsimilli Dene Gamesimillu aallussisut ukiuni avinneqarsinnaasumik kisitsisitalinni Arctic Winter Gamesimi unammereeraangamik ukiuni avinneqarsinnaanngitsunik kisitsisitalinni Avannaa Arctic Gamesimi unammisassapput.
- Neriuppugut timersuutitsinnik aallussisut amerlinerannik tamanna kinguneqarumaartoq. Maanna issittormiut ukiut tamaasa unammisalissapput unammisartuutittalu pikkorinnerulernerannik tamanna kinguneqarsinnaavoq, Kim Rosing oqarpoq.