Kalaallit Nunaata, Danmarkip USA-llu akornanni politikikkut maannakkut pisut ilungersunartut ullut tamaasa – nalunaaquttap akunneri tamaasa – allanngulertortuartut pineranni, politikerit nunanit taakkunanngaanneersut kiisami oqaloqatigiittussanngorput.

USA-p præsidentia Donald Trump, USA Kalaallit Nunaannik tiguaasariaqarnerarlugu arlaleriarluni oqareersorlu tamanna pissaaq.

USA-mi senatorit arlallit Kalaallit Nunaat pillugu ataatsimiititaliami aamma danskit Nunanut Allanut tunngasunut Ataatsimiititaliaanni, Det Udenrigspolitiske Nævnimi, ilaasortat ataatsimeeqatiginiarlugit Folketingimut sapaatip-akunnerani uani angalassapput.

Inatsisartut Nunanut allanut Sillimaniarnermullu Ataatsimiititaliaanneersut ataatsimiinnermut aamma qaaqquneqarput. Aaja Chemnitz (IA), Kalaallit Nunaannut ataatsimiititaliami siulittaasoq taama paasissutissiivoq.

- Ilumuunngitsut oqaatigineqaqattaarput, Kalaallit Nunaallu pillugu piviusoq siullertut kalaallinit tusarliunneqarnissaa pingaaruteqarpoq, pisumi matumani piviusunik ilisimaarinnittunik Kongressimimeersunik ileqarniassaagatta Kalaallit Nunaata anguniagaanik tapersersuisinnaasunik, Aaja Chemnitz ataatsimiinnissamut ataqatigiissaarisoq oqarpoq. 

Chemnitzip oqarnera naapertorlugu, Inatsisartuni ilaasortat Folketingimi ataatsimiinnermut najuunnissaat pilersaarutaavoq. Isumannaallisaanikkut pissutsit tassunga pissutaannguatsiarput.

- Kalaallit Nunaat pillugu oqallinnermi Inatsisartuni ilaasortat peqataanissaat pingaaruteqarluinnarpoq. Inatsisartut soorunamilu aamma Folketingip toqqaannartumik tusarliussaqarnissaat piffissami matumani ilungersunartumi pingaaruteqarpoq, Aaja Chemnitz oqarpoq.

Unneqarilluni oqaloqatigiinneq

Alaskami senatorip Republikaneriusup Lisa Murkowskip Aaja Chemnitz ataatsimeeqatigalugu Danmarkiliarusulluni oqarmat, ataatsimiinnissaq aaqqissuunneqarpoq.

Lisa Murkowski Issittumi Inatsisartuni, Aaja Chemnitzip siulittaasuuffigisaani, siulittaasup tulleraa.

Aaja Chemnitzip neriuutigaa pissutsit ilungersunarnerat ataatsimiinnermi paasitissallugu.

- Piviusut oqaatigineqassapput. Unneqqarilluta oqaloqatigiissaagut, taanna oqarpoq. 

IA-mi politikerip oqarnera naapertorlugu, pisut ilungersunarunnaarsinniarsarinissaat pingaaruteqarpoq. 

- Iliuuseqarnikkut pisumi uani toqqissisimalersitsissaagut.

Aammattaaq isumaqarpoq Danmarkip suliassat ilaat akisussaaffiginerusariaqarai.

- Danskit illersornissaqarfiata Kalaallit Nunaanni sulinera pitsanngorsarneqartariaqaraluarpoq. Pingaarutilinnik suli atuutilersinneqarsimanngitsunik aalajangigaqarpugut, taamaattumik inuit toqqissisimasinnaaniassammata tamakku piaartumik naammassineqartariaqarput. Siunissami pisinnaasunut assigiinngitsunut sakkussaqarluarnissatsinnut tamanna aalajangiisuussaaq, Aaja Chemnitz oqarpoq.

Politikerit nunanit pingasuneersut ataatsimiinnissaat ulloq suna pissanersoq senatorillu kikkut peqataanissaat naatsorsuutigineqarnersoq, oqaatigisinnaanngikkallarpaa.

Nunanut allanut tunngasunut naalakkersuisoq Vivian Motzfeldt (S) qallunaallu nunanut allanut ministeriat Lars Løkke Rasmussen Amerikamiut nunanut allanut ministeriat Marco Rubio ataatsimeeqatiginiarlugu Washington D.C.-mut aallalerput. TV 2-mit paasissutissat naapertorlugit ataatsimeeqatigiinneq pingasunngornermi pissaaq.