Aaja Chemnitz Kalaallit Nunaanni qineqqusaartoqarnerani sassarnianngitsoq

Inuit Ataqatigiinnersoq folkitinngimi ilaasortaq Aaja Chemnitz Inatsisartunut qineqqusaartuni sassarnianngilaq, martip aqqarnanni qinigassani qinersisoqalerpat ilaassanngilaq.

Nunatsinni piffissami pisoqangaatsiarnera ullorpassuarni eqqarsaasersorfigereerlugu sassarniarnani, nutaarsiassaqartitsivik Ritzau oqarpoq.

-Eqqarsarama eqqarsarama Inatsisartunut qinigassanngortinniarnanga aaliangiinnarpunga. Massakkorpiaq Folketingemi inissisimanera pingaaruteqartoq isumaqarpunga. Folketingip nunarput pillugu ataatsimiititaliaani siulittaasuugama, piffissami nalorninartoqaqisumi misilittagalimmik issiasoqarnissaa folketinngimilu nunarput sinnerlugu issiasoqarnissaa pingaartippara, Aaja Chemnitz oqarpoq.

Taassuma eqqarsaasersuutini nutaarsiassaqartitsivik Sermitsiamut pingasunngormat oqaluttuarai. Piffissami tassani nunatsinniippoq, iluatsillugulu IA-meersut aaliangerniarnermini isumasioqatigai.

Aaliangiusimasani allanngunngilaa, tassa Aaja Chemnitz 2015-imili folketinngimi ilaasortaasoq issiavimminiiginnassaaq.

-Qinerneqartussat siumoruminaapput, taammaammat qanoq Danmarkimi oqartussat isumaqatigiinniarnerini Folketinngimit aallartitaq nukittusariaqarpoq.

Tulliani Folketingimut qinersisoqalerpat qinigassanngortissanerluni suli aaliangiutinngilaa.

-Massakkorpiaq pisut pingaaruteqaqisullu annerusumik sammineqartariaqarmata, Foketingimi siunissami pisussat uterfigiumaarpakka, Aaja Chemnitz oqarpoq.