2011-mi nutaarsiassat atuarneqarnerpaat aajuku

Nassuttuumut aavariaq qivittunik marlunnik naammattuuisoq pillugu oqaluttuaq knr.gl-imi 2011-p ingerlanerani nutaarsiassani tamani atuarneqarnerpaatut inissippoq.
Allattoq Louise M. Kleemann
januaarip 05-at 2012 11:24

Amaasa Olsen Nassuttuumi nunap timaani ingerlaartilluni qivittunit, takisoorsuarnik nujalinnit, marlunnit saassunneqartoq pillugu oqaluttuaq taamaasilluni 4.813-ineriarluni atuarneqarpoq.

Nutaarsiassani atuarneqarnerpaat aappaattut inissittoq qivittunut attuumassuteqanngikkaluarluni atuartartut ilaannut qiiaammisitsivoq, tassami aalisartut piniartullu inuiaqatigiinni allanut sanilliullugit ajornerusumik inissisimannginnerat akileraartarnermut atugarissaarnermullu ataatsimiititaliamit naqissuserneqarmat. Nutaarsiassaq taanna marsimi saqqummersinneqartoq 2.274-eriarluni atuarneqarpoq.

Kujataani angallanneq pillugu oqallinneq 2011-mi aamma sammineqangaatsiartunut ilaavoq.

Air Greenlandip Kujataani sullissineranut naammagittaalliutit ikigisassaanngitsut upernariartornerani puttussuupput.  Taamaattumik timmisartortitseqatigiiffimmi pisortaaneq Michael Binzer Air Greenlandip akigititaanik angallassineranillu paasissutissiiartorluni kujataanut aallarpoq. Taamaasinerani naammagittaalliorlutik atsiornerit 1.179-it katersorneqarsimapput. Innuttaasunilli ataatsimiisitsinernut takkuttut atsiornernernut sanilliullugit amerlagisassaaasimanngillat, tassami  25-t 30-illu kisimik ornigussimagamik. Taamaasilluni Michael Binzerip pakatsinera pillugu nutaarsiassaq 2011-mi atuarneqarnerpaat pingajuattut inissippoq.

2011-mi nutaarsiassat atuarneqarnerpaat ataani takuneqarsinnaapput:

Nassuttuumigooq qivittoqarpoq, 4.813-init atuarneqarpoq

Aalisartut piniartullu atugaat allanngortitertariaqarput,  2.274-init atuarneqarpoq

Binzerip ataatsimiigiartukinnera pakatsissutigaa, 1.859-init atuarneqarpoq

Jørgen Kristensen Avannaata qimussersuanngorpoq,  1.294-init atuarneqarpoq

GA: Sisimiuni akikinnerusumik pilersinneqarsinnaavoq, 1.177-init atuarneqarpoq

'Kanngusunniaritsi', 1.166-init atuarneqarpoq

Norsaq HC pissartanngorpoq, 1.119-init atuarneqarpoq

Emil Joelsenip ujaarineqarnini pillugu oqaluttuartoq tusaajuk, 1.023-nit atuarneqarpoq

Ove Karl marloqiusamik inissisimasoq, 1.022-nit atuarneqarpoq

Poorskimi oqorsarnissaq eqqaamassavarsi, 1.022-nit atuarneqarpoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk