KNI angusaqarluartoq: 152 millioninik iluanaaruteqarneq

Namminersorlutik Oqartussanit pigineqartoq pilersuinermik niuernermillu ingerlatseqatigiiffik KNI 83,2 millionit koruuninik siorna amigartooruteqarpoq. 

Ukioq naatsorsuiffik naammassimmat KNI akileraarutinut akiliinnginnermi 152,4 millionit koruuninik iluanaaruteqarpoq. Ukiup ataatsip ingerlanerani angusat 236 millionit koruuninik pitsanngoriarneruvoq ‘missingersuusiarineqartunullu sanilliullugit pitsaanerujussuullutik´, ukiumoortumik nalunaarummi taama allaqqavoq. 

Suliffeqarfissuup saqqummiussaa naapertorlugu ikummatissanik nioqquteqarnermi nioqqutissaqarnermilu annertuumik aaqqissuusseqqinnikkut suleriuseqarnissamik allannguinerujussuaq pissutaavoq. 

Ikummatissat siuariartitsisut

Ikummatissaqarnermut ingerlatsivik ikummatissanik, perrassaatinik teknikkimullu gassinik nuna tamakkerlugu pilersuisoq ukiumut pingaartumik angusaqartitsivoq.

Ingerlatsivik akileraarutit akilinnginnerini 116,2 millionit koruuninik iluanaaruteqarpoq, ukiup siuliani 9,5 millionit koruuninik angusaqarsimanermut sanilliullugu. 

Siuariarneq umiarsuarnut takornariartaatinut ikummatissanik tunisaqarnerujussuaq, aalisarneq, aatsitassarsiornermik inuussutissarsiorneq allallu niuernikkut sullitat KNI-p sullissinissamut isumaqatigiissutaata avataaniittut pissutaapput.

KNI-p nalinginnaasumik pisisartut ikummatissanut akigitat qaffannerisigut iluanaaruteqarnermut peqqutaannginnerat aamma erseqqissaassutigaa.  

Ikummatissat akii 2025-mi upernaakkut naleqqussarneqarsimaneri ilumoorpoq, tamanna ukiup siuliani piviusorsiunngitsumik appasitsinneqarsimagaluarlutik. Suliffeqarfiulli pisisarnermut sivisuumik atuuttussatut isumaqatigiissutai kingorna akinik aalajaatsitsipput naak nunarsuarmi niuernikkut akit allanngoraraluartut. 

- Ukiumi angusamut niuernikkut immikkoortut marluk ineriartortinneqarnerisa iluatsilluarsimanerannik takussutissaavoq, KNI-p pisortaanera Jeppe Jensen oqarpoq. 

- Ikummatissaqarnermut ingerlatsivik umiarsuarnut takornariartaatinut, aalisarnermut aatsitassarsiornermilu inuussutissarsiornermut tunisinerujussuartigut siuariartorsimavoq saniatigut Nioqquteqarnermut ingerlatsivik niuernikkut pitsaanerusumik ingerlatsilersimavoq, pisortaaneq Jeppe Jensen oqarpoq. 

Nioqquteqarnermut ingerlatsivik pitsaanerusoq

Nioqquteqarnermut ingerlatsivik illoqarfinni nunaqarfinnilu 64-ini Pilersuisumik ingerlatsisoq allannguuteqarnermut aamma pissutaavoq.  

Ingerlatsivik 95,7 millionit koruuninik siorna amigartooruteqareerluni ukioq manna 32 millionit koruuninik iluanaaruteqarpoq. 

Suliffeqarfiup ukiumoortumik nalunaarutaa naapertorlugu siorna nalikilliliinerujussuit uteqqinneqannginneri nalinginnaasumillu ingerlatsinerup pitsanngoriarnerujussua siuariartitsipput.  

KNI-p aningaasartuutinik aqutsineruneq, nioqqutissat naleqqussarneri, inuussutissanut iluanaaruteqarnerunerit amerlasuukkaarlugillu tuniniaanerit kiisalu nioqqutissanut tuniuminaatsunut suliniuteqarneq ilaatigut siuariartornermut pissutaanerarpai. 

Ingerlatsineq nalinginnaasoq katillugit 54 millionit koruuninik pitsanngoriarsimavoq. 

Saniatigut KNI nutaanik atugassaqartitsinermi piumasaqaatinut naleqqussartariaqarsimavoq. Assersuutigalugu immiaaqqat imeruersaatillu puuinut maleruagassat nutaat, tupanik tuniniaanerup appariarnera kiisalu timmisartuussinermi allannguutit ilaatigut Kangerlussuarmi ingerlatsineq annikillisissimavaat.

Allanngortiterinermut atatillugu KNI-p 2026-mi novembarimit aallartittumik ukiuni pingasuni atuuttussamik Dagrofa ulluunerani nioqqutissanik pingaarnerusumik pilersuisussatut isumaqatigiissuteqarfigaa.

Nuummili agguaassinermut uninngasuutissanut toqqorsivik matuneqassaaq, siunissamilu nioqqutissanik pilersuineq toqqaannarnerusumik agguaassinermik tunngaveqarluni ingerlanneqalissalluni.

KNI-mit oqaatigineqartoq naapertorlugu taamaaliorneq nioqqutissanik assartuinerup aaqqissuunneqarnera pitsaanerulissaaq nioqqutissallu ingerlaarnerat aalajaannerulerluni.

Sinneqartoorutit aningaasaliinernut atorneqassasut

Naatsorsuutit pitsanngoriarnerat suliffeqarfiup illuutaanut atortulersuutaannullu aningaasaliisinnaanngortitsivoq.Siulersuisuni siulittaasoq Inger Eriksen sullitat sulisullu iluaqutigisassaannik pisariaqartunik KNI sinneqartooruteqarnermit aningaasaliisinnaalissanerarpaa.Ukiup naatsorsuiffiup ingerlanerani KNI sanaartukkanut atortuutinullu 108,2 millionit koruuninik aningaasaliivoq.

Suliniutit annersaasa ilagaat IT-systemimik nutaamik, Dynamics 365-imik, atuutilersitsineq. 2026-mi ukiaanerani taassuma atorneqalernissaa pilersaarutaavoq, pilersaarusiornermik, uninngasuutinik aqutsinermik kiisalu nioqqutissanik assartuussinermut aaqqissuussinermik pitsaanerulersitsissalluni.

Aamma nuna tamakkerlugu tankinut atortut nutarterneqarnissaat aamma ikuallattoornermi isumannaallisaanerup pitsanngorsarnera ingerlaannassapput.

Suli ilungersunartorsiortoq

Naatsorsuutit pitsanngoriarujussuaraluartut suliffeqarfiup suli ilungersunartorsiornera KNI-p oqaatigaa. 

Illoqarfinnut nuttarneq, attaveqaasersuutit allanngornerat nunaqarfinnilu sullitat ikiliartornerat KNI-p pilersuinerata tunngavigisaanik allanngortitsipput. 

Taamaattumik KNI-p periusissiaq Illerngit nutaat saqqummiuppaa. Taassuma suliffeqarfiup niuernermut ukkatarinnissinnaanngornerunissaa nunatsinnilu pilersuiinnarnissaq siunertaraa. Periusissiami ilaatigut digitalinngorsaaneq, ingerlatsilluarnissaq niuernikkullu immikkoortortaqarfinnik nutaanik ineriartortitsinissaq ukkatarineqarput. 

KNI illoqarfinni nunaqarfinnilu 64-ini pisiniarfinnik aamma illoqarfinni nunaqarfinnilu 68-ini orsersortarfinnik ingerlataqarpoq.  

Suliffeqarfimmi ukiup naatsorsuiffiup ingerlanerani atorfillit 783-it sulisorineqarput. 

Sinneqartoorutikinnerunissaq naatsorsuutigineqartoq

KNI-p ukiumi taama annertutigisumik angusaqaqqinnissaq naatsorsuutiginngilaa.  

Suliffeqarfik 2026/27-mi ukiumoortumik nalunaarutissami akileraarutinik akiliinnginnermi 100 millionit 125 millionit koruunillu akornanni angusaqassangavoq. 

Ukiumoortumik nalunaarummi allaqqasoq naapertorlugu nioqquteqarnermi ingerlatsivimmi ilaatigut aningaasartuuteqarnerulernissaq ikummatissaqarnermullu ingerlatsivimmi aserfallatsaaliuinermut aningaasartuuteqarnerulernissaq naatsorsuutigineqartumut pissutaapput.  

Saniatigullu nunani tamalaani ikummatissanik nioqquteqarnermi ineriartortitsineq iluanaaruteqarnissamut suli sunniuteqartorujussuussapput.