Aasianni puisit amiinik tunisineq ukioq kingulleq rekordiliisoq
Aasianni puisit amiinik tunisisarfimmut iseraanni puisip amiata tikka ilisarnartoq naamasassaavoq.
Ukioq kingulleq tunitsivimmut pitsaalluinnarpoq.
- 1000-it inortaraluarpagut. Ukioq kingulleq 1.100-t sinnilaarlugit tunivagut. Great Greenlandimut nassiunnikuuagut, ammerivimmi sulisoq Lars Peter Mølgaard oqarpoq.
Suliffeqarfiup natsiup aataallu amii ilaatigut tigoorarpai ukioq mannali naak puiseqarluaraluartoq ingerlalluarpallaanngilaq.
Maskiina ajutoortoq
Tunitsiviummi maskiinaa, qassaat, ukioq manna ajortoorpoq.
- Ukioq manna amminik killilimmik tigooqqaavugut. Qassaatitta ajutoornerata kingorna uluinnarmik suliaqartariaqalerneq pissutigalugu, Lars Peter Mølgaard oqarpoq.
Tunitsivimmi sulisut aalisartutut piniartutullu aamma inuuniuteqarput. Taamaattumik amminik tigooraanerat qassaatip ajortoornerata kingorna killeqarsimavoq.
- Uagut tigooqqaasutut ammerisutullu aamma nammineq aalisartuullutalu piniartuugatta piffissarput aallaavigalugu suliarisinnaasagut kisiisa annerusumik tigooqqarpagut. Soorunami nammineq suliareriikkat ammit orsortaajariikkat tigooqqarpagut. Kisianni suliassat orsortaajangassat killilimmik tigooqqartariaqarnikuuagut ukioq manna, Lars Peter Mølgaard oqarpoq.
Puiseqarluaraluarpoq.
- Puisikinnerunngikkaluarpoq, takussaasut tusarsaangamik taavalu pisaqartoqartarluni. Kisianni amernik tigooqqaasinnaanerput killeqarami taanna peqqutaanerorpasikkami, Lars Peter Mølgaard oqarpoq.
Ukiariartorpoq, imaq silalu unerisimajunnaariartorput puisinniartoqarnerulerlunilu.
- Qassaaviup atortussaa nassiunneqarpoq. Taanna piareeriarpat killeqanngiusattumik tigooqqaasinnaalissuugut. Ullormut suliarisinnaasagut ikalisussaagamik. Aamma ukiariartortillugu puisinut qassusersorneq aallartikkaangat amernik tigooraalluartaratta, oktobari, novembari decembarimilu ilanngullugu taakkunani amernik tigooqqaanerpaasaratta. Neriussuunga tassani tigooqqaalluarumaarluta, Lars Peter Mølgaard oqarpoq.
Nunarput tamakkerlugu ukioq ingerlalluarfiusoq
Great Greenland naatsorsuutinik nutaanik juunimi saqqummiussivoq.
Tassa ammerivik 2025-mi 1,6 millionit koruuninik iluanaaruteqarpoq. Ukiup siuliani 1,1 millionit koruuninik amigartooriarluni.
- Puisip amiinik 2025-mi tunisineq, naak 2024-mi appariaraluarluni naammaginartumiippoq 2023-milu tunisinermut sanillersuunneqarsinnaalluni, ukiumut nalunaarummi allaqqavoq.
Kaaviaartitat 2026-mi annikinnerulaalernissaat Great Greenlandillu 44.000 koruuninik ukioq manna sinneqartooruteqarnissaa naatsorsuutaavoq.