Vittus: Sermersooq aningaasanik naammattunik tunniussinikuunngilaq

- Kommuneqarfik Sermersooq ukiut siuliini annertunerusumik nalimmassaanissamut pilliuteqarnikuunngilaq, naak aningaasatigut atugassarititai taavalu isertitai inuiaqatigiinnit aallaaveqartut pisarsimagaluarai, Vittus Qujaukitsoq oqarpoq.

Aningaasaqarnermut Naalakkersuisoq ulluni makkunani avannaata kujataatalu kommuniinit nuannarineqarluarpoq, taakkumi nalimmassaarinermi aningaasanik amerlanerpaanik tunineqartussaagamik. Taamaattorli Qeqqata Kommunianit Kommuneqarfik Sermersuumiillu nuannarineqarpallaanngilaq.

Kommuneqarfik Sermersuumi qinikkat erseqqilluinnartumik oqaatigaat, kommunimi sullissineq eqqornerlunneqarujussuassasoq. 86 millionit koruunit nalimmassaarinermut akilertagassaasa qaavatigut, maanna aamma 56 millionit aamma akiliutaasussanngormata.

Suliffiit 160-it annaaneqaratarsinnaapput

Kommunip tungaanit eqqoriarneqarpoq suliffiit 160-it annaaneqassasut, inissaaleqinermi annertungaarmat sanaartornermut aningaasartuutissat ilanngarneqasinnaanngimmata aningaasat allatigut nassaarineqartariaqarput.

Tassa innuttaasunik sullissineq ajorteriassasoq Kommuneqarfik Sermersuumi borgermesteri, Asii Chemnitz Narupip oqaatigaa.

Qeqqata Kommuniani borgmesteri Hermann Berthelsen, Siumut, 12 millionit koruuninik missingersuutiminut nassaarniartussaassaaq. Maannamut pisortatigoortumik oqaaseqarusunngilaq, radioaviisimulli oqarluni aggustip aqqarngat nallertinnagu oqaaseqarumaarluni, ullormi taanna illuatungeriit naapillutik isumaqatigiinniartussaapput.