Vittus: Neqeroorutigineqartut tamaasa qallunaatut allannissaat pingaaruteqarpoq
IA sinnerlugu Inatsisartuni ilaasortaq Naaja Nathanielsen Inatsisartut oqaluttarfiannit qallunaatuinnaq oqaluttarpoq.
Taanna decembarimi Naalakkersuisunut apeqquteqarpoq, Namminersorlutik Oqartussat Nunatsinni suliffeqarfinnut suliariumannittussarsiuussigaangamik sooq qallunaatut allattassanersut paaserusullugu apeqqutigalugu.
Apeqquteqaammut Vittus Qujakitsoq Namminersorlutik Oqartussat isertitaannik aningaasartuutaannillu akisussaasuusoq, akissuteqarluni allappoq neqeroorutigineqartut tamarmik qallunaatut allannissaat pingaaruteqartoq taakkumi teknikkimut tunngassuteqarsinnaammata.
Oqaatsit pillugit Inatsisartut inatsisaat 2010-meersoq najoqqutarlugu piseqqusaarutini suliariumannittussarsiuussisarnerni assigisaannillu arlalitsigut qallunaat kalaallillu oqaasiisa atorneqarsinnaanerat inatsimmi ilanngunneqarpoq, tassalu neqerooruteqarnermi qallunaatuinnaq allattoqarsinnaasoq, Naalakkersuisut isumaqarput.
Suliffeqarfiit Naalakkersuisunut imaluunniit Namminersorlutik Oqartussanut sanaartortitsiniarunik tuniniaaniarunilluunniit, neqerooruteqartut tamarmik qallunaatut allallutik saaffiginnittarnissaat, Naaja Nathanielsenip apeqquteqaateqarnermini eqqumiiginartippaa. Tassami qallunaat oqaasiisa atorneqartarnerat isornartorsiorlugu Siumut partiillu allat qisuariartarsimammata.