VIDEO Stressimik eqqugaasimasoq ilinniarsimasunit ikiorneqarnissamik ujartuisoq
Taakkulu ilagaat Iluliarmiu Helga Nielsen, taassuma sassarnini paasititsiniaasoqalerneranik malitseqarsinnaassasoq neriuutigaa.
- Ikiorneqarnissara assut pisariaqartippara, ikiorneqanngikkuma piffissami sivisuumi napparsimassagama, Helga Nielsen KNR-imut oqarpoq.
Danmarkimi ikiortissarsiorniarpoq
Maanna taamatut inissisimanermini stressernermi qaangerniarnissaanut nammineerluni aqqutissarsiortariaqarpoq. Nunatsinnilu katsorsartinnissamut periarfissat amigaataammata Danmarkimut katsorsartikkiartorniarlugu aalajangersimavoq.
- Iliuuseqarfigisariaqarpara. Illora tuniarpara, pequtikka aamma tuniniarpakka.
- Alloriarnissama tullia tassaavoq, kommunip inissiaataanut utaqqisut allattorsimaffiannut allatsinnissara, peqqissiguma angerlarfissaqarniassagama.
Amerlasoorpassuit stresserlutik inuupput
Helga Nielsen stressernini pissutigalugu matoqqasunngorsimavoq, siornatigumillu naleqqiullugu tamakkerlugu isiginnissinnaajunnaarsimalluni.
- Arnaavunga aalajangiillaqqissoq sorpassuarnillu ataatsikkut ingerlataqarsinnaasoq, napparsimalernermali kingunerisaanik qarasara aqussinnaajunnaaqqavara, massakkullu kiserliortupilussuullunga, Helga Nielsen oqarpoq.
Nalinginnaasumik ikiuillaqqissuugaluarluni, napparsimanermi nalaani inuit peqqusarpai eqqissisimateqqulluni.
- ikiuukkusuttupilussuuvunga, maannakkulli uannut ikiiorsinnaananga.Taamaammat oqartariaqarpunga massakkut ikiuussinnaanngilanga napparsimagama, Helga Nielsen oqarpoq.
Danmarkimi ikiorserneqarnissani nammineerluni akilertussaassavaa.