VIDEO Angajoqqaat alianartumik eqqugaasut Facebook isumatusaartumik atoqquaat

Kingorna politiit aamma kaammattuutigaat qimagaasut ataqqineroqqullugit, toqusoqarneratalu nalerpiaani Facebookikkut tamanna allaatigisaqqunagu. Juaansinnguaq Therkildsenimummi tunngatillugu taamatut pisoqarpoq. Anaanaatalu, Louise Therkildsenip, politiit isumaqatigilluinnarpai.

- Facebookilinnut kajumissaarerusuppugut, ilaqutaasut eqqarsaatigilaartaqqullugit, soorlu pisoqarnerup nalaani immaqa Facebook tunuartilaarlugu.

- Tusassaqqaarpaat inuit allat, immaqa Facebookikkuunngittoq. Ilaqutaasut kalerreqqaartinnagit, taamatut Facebookip siulliusarnera uanga akuerisinnaanngilara, Louise Therkildsen KNR-imut oqarpoq.

Qatanngutaasut pingasut Facebookersimanngillat
Pisumi matumani, ataataasoq Ikerasammiittoq politiit pissarsiarsinnaasimavaat, nunaqarfiullu ajoqiata Louise Therkildsen Ilulissaniittoq pisoq pillugu kalerrippaa.

- Qujanartumik piffissap taassuma nalerpiaani, meeqqavut Facebookersimanngillat takusaqaratillu qujanavittumik, taanna uanga assut qujassutigivara.

AAMMA ATUARUK VIDEO Inunnut ataasiakkaanut tunngasunik sakkortuumik pisoqartillugu Facebookip atorneqartarnera politiit mianersoqqussutigaat

- Tusaqattaaleratsigu Facebook siulliulluni angalatitsilersimasoq, atialu ilanngunneqarsimalluni, uagutsinnut oqimaappoq taanna tusagaq.

- Oqimaareertoq saniatigut, Facebookikkut siulliulluta paasisimasuugutsigu immaqa paatsiveerusimaarsimassagaluarpugut, Louise Therkildsen oqarpoq.

Juaansinnguaq Therkildseniugaluaq Qaqortumi ilinniartuuvoq. Taannalu ikinngutini ilagalugit tasersuarmi nillertumi nalunnguarnermini noqartoorsimassangatinneqarpoq.