Vestager EU-Kommissærinngussaaq
Nunami namminermi aamma aningaasaqarnermut ministerip allamik atorfeqalernera pissutigalugu Danmarkimi naalakkersuisut nikerartussanngorput
Allattoq Elisa Isaksen
Danmarkimi naalakkersuisut nikerartussanngorput. Tamatumunnga pissutaalluni Nunami namminermi aamma aningaasaqarnermut ministeri Margrethe Vestager EU-mi kommissærinngornissaminut akuersisimanera. Taamaattumik taanna Danmarkimi naalakkersuisuni ullaap tungaani ilaasortaajunnaarpoq, soorlu aamma Radikalini siulittaasutut tunuartoq, Morten Østergaardimillu taarserneqarluni.
Ministeritut tunuartoq EU-milu kommissærinngortussaq naalakkersuinikkut ikinngutiminit akerlerisaminillu ruusarpassuarnik tunineqarpoq. Taassuma suliassani nutaat qilanaarai.
- Tamanna sulianni immikkoortuuvoq nutaaq, aammami oqaatsit allat atorlugit sulisussanngornera allarluinnaasussaagami, Vestager DR-imut taama oqarpoq.
Silap pissusianut EU-mi kommissæri Connie Hedegaard Ritzauimut oqarpoq, taamaalilluni Danmarkimi politikerit ataqqisaanerpaat ilaat EU-mi kommissærinngortussanngortoq, taannalu sunniuteqarsinnaassasoq, tusaaniarneqarluni paasiuminaassinnaasunut iserniartussaassalluni nunanilu tamalaani maluginiarneqassalluni.
- Margrethe Vestagerip toqqarneqarnera ajunngilluinnarpoq, isumaqarpungalumi tamanna toqqaalluarnerusoq. EU-Kommissionip suut tamaasa isumaqatigiissutigereerlugit aalajangiiffigisarpai, taamaalilluni naalakkersuinikkut silittumik sunniuteqartoqarsinnaalluni, tamatumunngalu Margrethe Vestager piukkunnarluartuuvoq, Connie Hedegaard oqarpoq.
Margrethe Vestagerip Danmarkimi naalakkersuisuni ilaasortaajunnaajunnarluni Bruxelles-imut nuuttussanngornerata kinguneranik, taassuma parteeqataa Morten Østergård nunami namminermi aningaasaqarnermullu ministerinngortussanngorpoq.
Taanna taamaalilluni Akileraartarnermut ministeriunerminit tunuartussanngussaaq, DR-imillu tusarfiit kinaassusersineqanngitsut oqaatigaat Socialdemokratit tassani ministeriutitaqalissasut.