Uummannami tunitsiviit pingasunngussappata amerlavallaarnerarpaat

- Uummannami pingasunik aalisakkanik suliffissuaqarnissaanut inissaqarnerluni? NuSuKap siulittaasua Gerth B. Lynge aperivoq. Taanna isumaqarpoq suliffeqarfik tunisassiorfiliorniartoq tassaasimassasoq Polar Seafood.

- Polar Seafood pilersaaruni Royal Greenland unammillerniarlugu, taava piginneqatigiiffiit pingajuat Upernavik Seafood sussava? Taassuminngami piginneqataapput Royal Greenland aamma Polar Seafood, Gerth B. Lynge oqarpoq.

Sulisitsisut kattuffianni siulittaasup paaserusuppaa qaleralinnik tunisassiorneq annertusaaviginiarneqarnersoq, aammalu Polar Seafood Uummannami aallartisaaniarnersoq.

Paatsoortoqarsimagunarpoq

Polar Seafoodili minnerpaamilluunniit Uummannami aalisakkiorfiliorniarluni allamilluunniit sananissaminik pilersaaruteqanngilaq.

- Gerth B. Lynge Uummannami qanoq pisoqarnissaanik paatsuugaqarsimassaaq. Tusarnikuuara allat aallartisaaniarlutik pilersaaruteqartut, Polar Seafoodili tamakkununnga attuumassuteqanngitsoq pisortaq Henrik Leth oqarpoq.

- Maannakkorpiaq qalerallit akii appaseqimmata sumiluunniit ammaaniarluta pilersaaruteqanngilagut pisortaq naggasiivoq.