Utoqqalinersiami saniatigut aalisarnermik piniarnermillu tapertaqartariaqartoq
John Larsen 77-inik ukioqartoq utoqqalilersiaqaraluarluni saarullinniakkajuttarpoq. Tamannali sunngiffimmini soqutigisariinnanngilaa.
- Nioqqutissat inigisamullu akiliutit qaffakkaluttuinnarput, utoqqalinersiallu saniatigut tapertaqanngikkaanni inuussutigiuminaapput, John Larsen KNR-imut oqaluttuarpoq.
John Larsenip utoqqalinersiuteqartut akiliisinnaassusaat ernumanartoqartippaa:
- Utoqqalinersiutit taama ikitsigisut kisiisa inuussutigineqarsinnaanngillat, taamaammat allanik isertitassarsiortoqartariaqarpoq.
John ullumikkut 77-inik ukioqarpoq, peqqikkaluarluni sulilu aalassarikkaluarluni utoqqaliartornini malugisinnaavaa.
- Aallaaniarnissara nuannarivallaarunnaarpara. Isikka ajornartorsiutigigakkit, umeraangata marloqiusamik isigisarlunga. Taamaammat ippassaq puisinniarama unioqattaarpunga, John Larsen oqaluttuarpoq.
John Larsen pillugu Qanoruumi ilanngutassiaq uani isiginnaarneqarsinnaavoq
Utoqqalinersiutillit utoqqalinersiutinik pissarsiarisartakkaminnit pisisinnaassusaat annertunngilaq, utoqqalilersiuteqartullu inuuniarnikkut atugaat ajornerulissanngippata John politikerit ima siunnersorusuppai:
- Nunatsinni utoqqaat amerliartuinnartussaasut nalunngilarput. Taamaammat aamma utoqqalinersiutit qaffanneqassagaluarpata tamanna inuiaqatigiinnut akisuupilussuussaaq. Utoqqalinersiutilli qaffaavigineqaraluarpata aningaasat ilarpassui akileraarutinut akiliutitut atorneqassagaluarput, John Larsen oqarpoq nangillunilu:
- Siunnersuutigerusuppara akileraarutinut akiliutigisartakkavut affaannanngortinneqarnissaat sulissutigineqassasoq. Taakkumi affaannanngortinneqarneri utoqqalinersiutit qaffanneqarnerinit pitsaanerussaaq.
Sivittunngitsoq ukiariartoqqilissaaq, taamaakkaluartoq John Larsenip aalisarneq piniarnerlu utoqqalinersiutiminut tapertarinissaat ingerlatiinnarniarpaa.
- Uatsinnut aaqqiissutissamik nassaartoqartariaqarpoq, siunnersuutigisamalu isiginiarneqarnissaat kissaatiginarpoq. Tassami pissutsit taama ittut atugaraagut, taamatullu atugaqarneq kikkunnilluunniit akuersaarneqarsinnaanngillat, John Larsen naggasiivoq.