USA uranimut tunngatillugu piginnaanngorsaanissamik neqerooruteqarpoq

Kalaallit Nunaata Danmarkillu uranimik piiaasinnaanissannut avammullu niueruteqarnissaannut, USA neqerooruteqarpoq naliginnaasumik piginnaanngorsaasinnaallutik. Taama nalunaarpoq Naalakkersuisut siulittaasuat, Aleqa Hammond, paragraf 37 naapertorlugu Sara Olsvig-ip, Inuit Ataqatigiit, apeqquteqaataanut akissuteqarnermini.

Sara Olsvigip paaserusuppaa, urani aatsitassallu qinngornernik ulorianartunik akullit pillugit, USA-mik suleqateqarnissaq  imalunniit tamanna pillugu oqaloqatigiinninneq pisimanersoq. Tassalu taamaattoqarsimavoq.

- USA-p, Danmarkip aamma Kalaallit Nunaata akornanni, 'Joint Komete'-mik isumaqatigiissutaanni atugassarititat iluini, amerikamiut 2013-imi aasaq sioqqullugu, taasamik 'traineeship'-imik aaqqissuussamut tunngatillugu neqeroorummik saqqummiussinissamik pilersaaruteqarlutik oqaatigaat, tassani kalaallit danskillu oqartussaasui periarfissinneqarput, Nuclear Regulatory Commission pillugu isummaminnik annissinissamut, Aleqa Hammond akissummini ilaatigut taama allappoq imalu nangilluni.

- Qallunaat oqartussaasui aamma kalaallit oqartussaasui aamma periarfissinneqarput, pisinnaasaminnik annertusaaffigineqarsinnaasut, tassa kursusertinneqarsinnaasut amerikamiunit neqeroorutaalluni. Taamaaliortoqassalluni amerikamiut naalakkersuisuinut atomi pillugu siunnersotit atorlugit. Aleqa Hammond allappoq.

Taassuma naatsorsuutigaa, piginnaanngorsaanermini ilikkagassanut ilaassasut qinngornernik ulorianartunik passusseriaatsit qanoq ittu atorneqassanersut paasisaqarfiginissaat aamma avatangiisinut tunngasut eqqarsaatigalugit periusissat qanoq ittuussanersut paasisaqarfiginissaat. Pikkorissarneq qaammatini arfinilinniik ukiut marluk tikillugit sivisussuseqarsinnaasoq, Aleqa Hammondip Sara Olsvig-imut akissummini aamma allaaseraa.