Uranimut politikki Inuit Ataqatigiit Inuusuttaasa appisaluuppaat

- Misissuinerit tusarniaanerillu naammanngikkaluartut misissueqqissaartoqarsimaneranik tusarniaasoqarsimaneranillu neqitserlutik Naalakkersuisut piiaaqqusinnginneq sukkanerpaamik atorunnaarsikkusummassuk toqqissisimananngilaq, Inuit Ataqatigiit Inuusuttaanni siulittaasoq, Múte Borup Egede oqarpoq.

Innuttaasut uran pillugu tunngaviusumik ilisimasaqanngippallaaqaat, taamaammat Naalakkersuisut uran pillugu paasititsiniaallutik aallartittariaqartut taanna isumaqarpoq, innuttaasut isummernissaminnut taamaalillutik tunngavissaqalerniassammata.

Aamma eqqarsarnartoqanngitsuunngilaq uranimik atuinngilluinnarnissaq atorunnaarsikkusunneqarmat, Inatsisartut siulittaasuata, Lars-Emil Johansenip, aatsitassanut soqutigisaminit qaammatit marlussuinnaat matuma siorna tunuarniuteqareersorlu. Lars-Emil Johansen Greenland Minerals and Energy-mi, tassa GME-mi siulersuisuni siulittaasuusimavoq, suliffeqarffik taanna Kuannersuarni uranimik piiaanissami tunuliaqutaavoq.