Unammilleqatigiinnissamut inatsit GA-p oqallisigissavaa

Periutsit unammilleqatigiinnermik naleqatigiinngisitsisut GA-mit akiorniarneqarnerat pingaartillugu ataatsimiittoqassaaq. Assersuutigalugu isertorluni isumaqatigiissuteqartarnerit, suliffeqarfiillu suliarinnnittussarsiuussinermi unioqqutitsisarneri pinngitsoortinniarlugit GA suliniuteqarpoq.

Taamaaliortoqartarnerami Nunatsinni inuussutissarsiornikkut ineriartortitsinissamik nammineq suliffiutillit kissaataasa akerlerilluinnaraat, GA ilaatigut allappoq.

Unioqqutitsisoqannginnissaa anguniarlugu inatsisit atuuttut inuussutissarsiutinik ingerlatalinnut paasititsiniutiginiarlugu ataatsimiinnermik aaqqissuusisoqarpoq.

Kalaallit Nunaanni unammilleqatigiinneq pillugu inatsisissaq pillugu aqutsisoqarfimmi pisortaq Nicolai Odgaard, saqqummiussisunut ilaassaaq.

Oqartussat paasissutissanik sumit pissarsisarnersut, nakkutilliinerillu qanoq ingerlanneqartarnersut, ataatsimiinnermi aamma sammineqarumaarput.

Paasissutissanik unammilleqatigiinnermut tunngasunik imminut paasissutisseeqatigiittarneq qaqugukkut inerteqqutaalertarnersoq pingaartillugu minnerunngitsumik aamma sammineqassasoq nalunaarutigineqarpoq. Suliariumannittussarsiuussinermilu qaqugukkut unioqqutitsisoqartarnersoq aamma sammineqassaaq, tamannalu pillugu suliassaqarfiit assigiinngitsut peqatigiiffiisa malittarisassaat qanoq ittuunersut aamma sammineqassalluni.

Ataatsimiinnermi saqqummiussat isiginnaagassianngorlugit immiunneqarumaarput, oqariartuutit nuna tamakkerlugu takuneqarsinnaanngortinneqassammata.