Umiatsiami ajunaartut marluinnaat kinaassusersineqarput

Qeqertarsuup Tunuani umiatsiap alianartumik umiuneratigut inuit sisamat ajunaarput, ikinnerpaamillu ataaseq suli ujarneqarluni. Taakkunannga maannamut marluinnaat kinaassusersineqareerput. Taakku tassaallutik nuliariit 70-it sinnerlugit ukiullit Jyllandimi Fredericiameersut. Taakku qanigisaat ajunaarneq pillugu ilisimatinneqareersut, Jyllandip Kujataata kangiani politiit Radioaviisimut ilisimatitsissutigaat.
Allattoq Elisa Isaksen
aggustip 27-at 2014 17:14

Ilulissani politiit ippassaq unnukkut nalunaaqutaq 20.21 Aasiaat Radiuannit naatsumik nalunaarfigineqarput, tassani oqaatigineqarluni umiatsiaq kinaassusersineqanngitsoq Nunaqarfiusimasup Appat eqqaanni ajunaalernerminik kalerrisaarisoq, umiatsiaq kivilersoq oqaatigineqarluni.

Politiit ingerlaannarlutik annaassiniarnermik aallartitsipput, ilaatigut qulimiguulik S61 pineqartumut ujaasiartortinneqarluni. Umiatsiat angallatillu ujaasinermi aamma peqataapput.

Ajunaalernermilli kalerrisaarisut sumiissusersineqanngitsoorput.

Qulimiguullip S-61-ip ullaaq arferngup missaani ajunaarsimasut sisamat ujaasiffigineqartumi sissamiittut nassaarai.

Morten Nielsenip politiineersup tamanna oqaluttuaraa.

Umiatsiaq ajunaarsimasunik aallertinneqarmat ajunaarsimasut sisamat, tassaasut angutit marluk arnallu marluk Ilulissiaanneqarput.

Taakkunannga maannamut marluinnaat kinaassusersineqareerput. Taakku tassaallutik nuliariit 70-it sinnerlugit ukiullit Jyllandimi  Fredericiameersut. Taakku qanigisaat ajunaarneq pillugu ilisimatinneqareersut, Jyllandip Kujataata kangiani politiit Radioaviisimut ilisimatitsissutigaat.

- Nuliariit taakku nunaqarfimmi Saqqamiissimapput Ilulissanullu angallassisussaminnik isumaqatigiissuteqarsimasut Morten Nielsenip oqaatigaa.

- Ajunaartut allat marluk suli kinaassusersinngilavut, umiatsiarlu umiusoq umiatsiamillu aquttoq suli ujarpavut, taanna oqarpoq.

Umiatsiami aquttup aamma ajunaarsimanissaa politiit ernummatigaat.

- Taanna ajunaarnermi alianartumi ajunaartut tallimarisinnaammassuk nassuerutigaarput, Morten Nielsen oqarpoq.

Sila ajunaarfiusumi ippassaq unnukkut ajorpoq, sakkortuumik anorlerluni, umiunermullu suna patsisaasimasinnaanersoq politiit taamaallaat eqqoriarsinnaavaat.

Ajunaarneq sukkasoorujussuarmik pisimassangatinneqarpoq, tassami ajunaalernermik kalerrisaarut suminngaanneerpiarnersoq kimillu nalunaarutigineqarnersoq paasineqarsinnaasimanngimmat.