Umiarsuaq nunatsinneersoq qaqutigoortumik nersornaasigaasoq

Sinersortaatip Sarfaq Ittuup motooria pingaarneq pisiortorfiata MAN-ip allattorsimaffiini immikkut ittumik maanna inissisimalerpoq. Motooriliorfik MAN Diesel, Tysklandimeersoq, Sarfaq Ittuup motoorianik pilersuisuuvoq.
Allattoq Mads Lynge
septembarip 17-at 2014 03:16

Sarfaq Ittuup motooria katillugit akunnerit 100.000-it sinnerlugit maanna atorneqarsimalerpoq, allatulluunniit oqaatigalugu: Taama sivisutigisumik atorneqarsimanera assigaa uninnani ukiuni aqqanilinni qaammatinilu tallimani ingerlasimasoq.

Sarfaq Ittuk kitaata sineriaani ukiumut qaammatini qulingiluani ingerlaartarpoq, ilaasut assersuutigalugu kujataani Qaqortumiit avannaani Ilulissanut ullut sisamaata qeqqa angallanneqartarlutik. Sarfaq Ittuup taama ingerlaarnermin illoqarfiit nunaqarfiillu katillugit qulit tikittarpai.

Umiarsuaq ukioqqortusiartulersoq
Naak Sarfaq Ittuk teknikkikkut isigissagaanni suli pisoqalivallaanngikkaluartoq, umiarsuaq ukioqqortusiartulerunarpoq, tassami maanna 22-nik pisoqaassuseqarpoq. 1992-imi sananeqarpoq, ukioq 2000-imi tallineqarluni.

Sarfaq Ittumi maskiinalerisut, Arctic Umiaq Line-ip pisortaanera Jette Larsen naapertorlugu, umiarsuup motoorianik paarsilluarsimammata, Sarfaq Ittuk ulloq manna tikillugu ajunngitsumik angallassisinnaasimavoq.