Ukrainemut Israelimullu ikiorsiissutissatut siunnersuutit USA-mi inatsisartut aappaanni taasissutigineqassasut
Ukrainemut, Israelimut, Taiwanimut nunanullu iligisanut allanut ikiorsiissutissatut siunnersuutit tamarmik immikkut, USA-mi innuttaasut sinnerlugit sinniisoqarfiup, tassa Repræsentanternes Husip taasissutigissavai.
Repræsentanternes Husip siulittaasua republikaneriusoq, Mike Johnson, taama ilisimatitsisoq, aviisi The New York Times allappoq.
USA-p præsidentiata. Joe Bidenip, ikiorsiissutissatut siunnersuutai ataatsimut 95 milliardit dollarinik, tassa 666 miliardit koruunit missaannik aningaasartaqarput.
Ikiorsiissutissatut siunnersuutit senatimi akuersissutigineqareerput, Repræsentanternes Husimili aamma akuersissutigineqartussaallutik. Qinikkalli Mike Johnsonip tamanna pillugu taasitissimanngilai.
Republikanerimmi sinnerlugit ilaasortat arlallit Ukrainemut ikiorsiissutissanik amerlanerusunik nassiussisoqarnissaa akerleraat.
Republikanerit ikiorsiissutissatut siunnersuutinik arlalinnik demokratit siunnersuutaannut assigiinngitsutigut assigiissuteqartunik suliaqarumaartut, Mike Johson ilisimatitsivoq.
Ukrainemulli, Israelimut, Taiwanimut nunanullu iligisanut allanut ikiorsiissutissatut siunnersuutit ataatsimut taasissutiginagit siunnersuutit immikkoortut pingasut taasissutigissavaat.
- Taasissutigineqartussat ataatsimut isigalugit demokratit siunnersuutaannut assingupput, aningaasallu pineqartut nunanut pineqartunut aamma ingerlajumaarput, Mike Johnson The New York Timesimut oqarpoq.
