Ukioq kingulleq pissartat I-69-meersut finaalertussanngorput
I-69 unamminermini siullermi Nûk Nuummeersut 1-0-imik ajugaaffigaat. Unamminermi aappassaani aaqqissuisut, Sisimiuneersut, S-68, 6-0-imik ajugaaffigerujussuarpaat.
Pingasunngormat Kugsak-45 Qasigiannguaneersut I-69-mut ataaseraarlutik isertitsipput, I-69-ili 3-1-imik ajugaavoq.
Unamminerni sisamaasuni unamminerit pingasut unammereerlugit 9 pointinnareermata arnat Ilulissaneersut allanit anguneqarsinnaajunnaareerput, taamaasillutillu sapaatiuppat sisamanut Sisimiut arsaattarfiani pissartanngorniutivinnermi unammisussanngorlutik.
Nûk pissartanngorniutivinnermut unammeqataasariaannanngulerpoq
Pissartanngorniutivinnermi unammisussat aappaat Nûk-meersuussasut ilimanarseqqavoq, taakkumi 6 pointeqqallutik tullersortaagamik.
Nûk maannamut 16-inik isertitsisimavoq pingasunillu isertitsiffigineqarsimalluni. Sisamanngormat FC Malamuk Uummannameersut 10-2-mik ajugaaffigaat. S-68 pingajutut maanna inissisimasoq aamma 6 pointeqqavoq taakkuli maannamut, pissartanngorniutivittoqannginnerani unammisassatik tamakkereerlugit, pingasuinnarnik isertitsisimapput 13-inillu isertitsiffigineqarsimallutik.
Pissartanngorniutivittoqannginnerani kingullerpaallutik Nûk Kugsak-45-lu unnugu arfineq marlunut unammissapput. Arnat Qasigiannguaneersut pingasunik pionteqarput, sisamaattullu inissisimallutik. Maannamut pingasunik isertitsisimapput sisamanillu isertitsiffigineqarsimallutik, Nûk-mullu 14-inik isertitsissallutik pissartanngorniutivinnermut anngukkumagunik. Tamanna ilimanaateqarpallanngilaq.
FC Malamuk maannamut suli pointinnanngilaq unamminerminnilu kingullermi maannamut arsarluarnerpaat I-69-imeersut unammissallugit.
Bronzennanniunneq arfininngorpat marlunut pissaaq. Pissartanngorniutivinnerlu sisamanut ingerlanneqassalluni. Ukioq kingulleq pissartanngorniuttut ukioq manna aamma naapeqqinnissaat ilimanaateqarpoq.
Unamminerit KNR Radiokkut toqqaannartumik malinnaavigisinnaavatit.