Ujakkaarluni Nunatsinni pissartanngorniunneq aqqut alla atorlugu ingerlanneqassaaq
Ujakkaarluni nunatsinni ukioq manna pissartanngorniunnissat, marsip 24-anni pisussatut pilersaarutaasut, Nuummiiginnassapput.
Allattoq Jens Thorin
marsip 20-at 2013 06:33
Kalaallit Nunaanni Sisorarartut kattuffianneersut Nuummilu sisorartartut peqatigiiffianni NSP-meersut Quassussuup qaavani pissutsit takuniarpaat.
Naallu Nuummi ulluni kingullerrni issangiaraluartoq tamanna aputeqarpoq.
- Nunatsinnit pissartanngorniunnerit Quassussuup qaavani pissasut uppernarsarsinnaaavarput. Majuartaatip napparutaata qulliup eqqaaniit avannamut kangimut ingerlaarfeqassaaq, pissartanngorniunnissami ataqatigiissaarisoq NSP-meersoq Poul Petersen oqarpoq.
Ullunili tulliuttuni apinngippat, unammisulli ujakkaarfiup 1,5 kilometeriinnaanissaa naammagiinnartariaqassavaat.
