Tusagassiortoq: Umiarsuit takornariartaatit umiunissaat pinngitsoortissinaavarsi
Taassuma Tunup avannaani umiarsuarmik takornariartaammik annaassiniartusaarluni ukiut pingasut qaangiuttut sungiusartoqarnerani peqataavoq, takusanilu aallavigalugit upalungaarsimanermut tunngasunik iluarsiisoqarsimanngitsoq nalilerpaa.
Umiarsuarni takornariartaatini upalungaarsimaneq pillugu Michael Aagaard Jensenip oqaluttualiani siulleq, Danmarkimi tusagassiornermut ilinniarfimmi soraarummeerutitut 2009-imi allappaa, tusagassiortunngorniaqatini Thomas Råhlin peqatigalugu.
Allaaserisaq umiarsuup Explorerip Sikuiutsoq kujallermi 2007-imi umiuneranit aallaaveqarpoq.
- 2009-mi allaaserineqarneranit 2012-mi sungiusartunut malinnaanitsinni takuarput upalungaarsimaniarneq allannguuteqarsimanngitsoq. Taava upalungaarsimanermut tunngassuteqartunut malinnaalerpoq. Tunup avannaanut 2012-mi angalaqataavoq, umiarsuaq takornariartaat ajutoortuusaartillugu sungiusarneq annertooq malinnaaffigalugu.
Malittarisassiortoqarsimanngilaq, upalungaarsimasussanik annertuunik suliaqartussanik soqanngilaq - taamaammat ajornartorsiut suli atuuppoq, taamaammallu ajornartorsiutip samminera nangipparput, Michael Aagaard Jensen oqarpoq.
Suleqatinilu Thomas Råhlin atuakkianik tusagassiunermillu suliffeqarfimmut Zetlandimut atassuteqarput - tassuunalu oqaluttualiaq Den Antarktiske Engel - Sikuiutsoq kujallemi inngili - tallimanngornermi juunip 27-ani saqqummersinneqassaaq.
Oqaluttualiaq allaaserisaavoq aviisini allaaserisanit takinerusoq atuakkanilli naannerulluni.
Tusagassiortut upalungaarsimaniarneq politikerinut oqaluuserisassanngortikkusukkaat
Umiarsuup Sikuiuitsoq kujallermi ajunaarnera Kalaallit Nunaata ilinniarfigisimagaa, Michael Aagaard Jensenip qularutiginngilaa. Upalungaarsimasut pisinnaasartik tamaat iliuuseqarnerat qularutiginngilaa, taakkualu pinnagit politiikerilli eqeersarniaritik Michael Aagaard Jensen oqarpoq.
- Kalaallit politikerit kisiisa pinnagit, aammali danskit politikerit eqqarsaatigaavut. Imaani upalungaarsimanissaq danskit illersornissaqarfiata ataani Issittumi sakkutooqarfimmit oqartussaaffigineqarpoq, ajutoortoqaraluarpallu danskit oqartussaasui akissussaaffeqarput, apeqqutaaginnalerporli tamanna tulleriiarinerminni pingaartinneraat, Michael Aagaard Jensen oqarpoq.
Oqaluttualiami aqagu saqqummertussami qallunaat aappaariit amerikamiorlu assiliisartoq umiarsuarmi takornariartaammi Explorerimi ilaasut oqaluttuarineqarput.
Umiarsuup umiunerani nalunaarusiaq naapertorlugu atukkiortut oqaluttualiaq allappaat.
Oqaluttualiami inuttat pingaarnerit oqaluttuarineqarnerisa saniatigut umiarsuit takornariartaatit imaani sikoqarluartumi angalaneranni ajornartorsiutaasartut sammineqarput.
33-nik ukiulik Michel Aagard Jensen 2007-miilli nunatsinniittarpoq. Illersornissamut qullersaqarfimmi atorfeqarsimavoq nunatsinnilu illersornissaqarfiup suliai allaaserisimallugit.
