Tusagassiornermi inatsisileritooq: KNR Naalakkersuisuniit aqunneqassanngilaq
Kisianni tulluanngilaq KNR-imi siulersuisussat amerlanerussutaat Naalakkersuisuniit toqqarneqartalerpata, Danmarks Medie og- Journalisthøjskolemi tusagassiornermi inatsisileritooq Oluf Jørgensen taama isumaqarpoq.
-Pingaartuuvoq inuiqatigiit oqartussaaqataaffianni tusagassiuutit kiffaanngissuseqarnissaat. Naalakkersuisuninngaanniit aqunneqartussaanngillat. Taamaammat tulluanngilaq KNR-ip siulersuisuini ilaasortat amerlanerit Naalakkersuisut toqqartalerpagit, Oluf Jørgensen taama oqarpoq.
Radioqarneq tv-qarnerlu pillugit inatsisissattut Naalakkersuisut siunnersuuteqarput.
-Inatsisissatut siunnersuutip pingaarnerusukkut siunertaraa radioqarnerup tv-qarnerullu iluanni pisariaqartinneqalersimasunut inatsisit atuuttut naleqqussarnissaat, Naalakkersuisoq Nick Nielsen inatsisissatut siunnersuutimini taama oqaaseqaateqarpoq.
Naalakkersuisut siunnersuutiminni oqaatigaat allannguutissatut siunnersuutit KNR-imi aqutsinermut nukittorsaataassasut, aamma siulersuisut sunniuteqarluarnerunissaat aaliangiisinnaassusaallu nukittorsaataassasoq.
Nick Nielseni KNR-mut oqarpoq ernumanartoqanngitsoq.
-Isumaqarpunga aarlerinartoqanngitsoq. Uani eqqarsaatigineqartariaqarami Naalakkersuisut toqqaanerminni tunuliaqutigivaat pisinnaasat tunuliaqutit.Taakkua toqqammavigalugit ingerlatsinissaq aallaaviujuaannassaaq. Politikkikkut aqunneqarnissaa Naalakkersuisuninngaanniit oqariartuutaanngilaq, Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoq, Nick Nielsen taama oqarpoq.
Inatsisissatut siunnersuut akuerineqarpat KNR-imi siulersuisuni ilaasortat tallimanngussapput, taakkunanilu sisamat Naalakkersuisuniit toqqarneqartalissapput, ataaserlu KNR-imiit toqqarneqartalissalluni.
Kisianni taamannak pisoqartalerpat inuiaqatigiit atuisullu KNR-imut tatiginninnerat annikillisinnaavoq, Oluf Jørgensen oqarpoq.
-Pingaartuuvoq tusagassiorneq Naalakkersuisuniit sunnerneqannginnissaa, aamma KNR-ip siulersuisui amerlanerussuteqartut Naalakkeruisuniit toqqarneqartalerpata inuiaqatigiit tusagassiuutinut tatiginninnerat ajornakusuulersinnaavoq, taama oqarpoq Oluf Jørgensen.
Tusagassiuutilerinermi inatsisilerituut Oluf Jørgensenip nalilerpaa killeqanngitsumik oqaaseqarsinnaaneq innarlerneqassasoq.
- Taamaattoqariaannaavoq. Inuiaqatigiit tusagassiuutinut tatiginnissinnaaniassappata pingaaruteqarpoq Naalakkersuisut tusagassiuutinut aqutsinnginnissaat, Oluf Jørgensen taama oqarpoq.
KNR-ip siulersuisui massakkut arfineq-marluupput, taakkunanilu marluk Naalakkersuisuniit aaliangerneqartarput. Taakkunani marluusuni ataaseq siulittaasussatu toqqarneqartarpoq.