Tunumi nannut kisinneqalerput
Taamaallilluni ukiortaamiit piniartunik nannunniartartunik Tasiilap Illoqqortoormiullu eqqaaneersunik tusarniaalluni apersuinerit aallartinneqassapput.
Nannunik misissuinissani piniartut aallaqqaataaniilli peqataatinneqassapput.
Pinngortitaleriffimmit ilisimatuutut misissuisut 2015-ip upernaanerani Tasiilap eqqaani nannunik qaammataasanut nassitsissusilersuissapput. Taakku iluaqutsiullugit nannut nikerartarnerat malinnaaffigineqarsinnaalissaaq.
Tamatuma saniatigut nannut kingornuttagaasigut 2015-ip ingerlanerani misissuiffigineqassapput, taamalu misissuinerni Illoqqortoormiuni Tasiilamilu piniartut misissugassanik katersitinneqassallutik.
Misissuinikkut Tunumi nanoqatigiiaat immikkooruteqarnersut paasiniarneqarpoq, taamalu aqutsivinnik immikkoorsitsinissaq pisariaqarnersoq paasiniarneqassalluni.
Nannunik kisitsineq pisariullunilu akisuujuvoq. Tamannalu patsisigalugu nannut Tunumiittut kisinneqanngisaannarsimapput.
Maannali Pinngortitaleriffimmeersut nutaamik alloriarnialerput, Tunumi nannut pillugit 2019-imi nungusaataanngitsumik nannunniartoqartarnissaannut siunnersuinissaq siunertaralugu.
