Titartaasarfik: Inatssiartut ataatsimiitarfia iluarsaakkaanni akikinnerussaaq
Taama oqarpoq, illussanik titartaasartoq Tegnestuen Nuummi sulisoq, Peter Barfoed aviisimut Politikenimut ullumi saqqummersumut.
Inatsisartut ataatsimiittarfiata iluarsartuunneqarneratigut aamma qulaani nutaanik ininik immikkut ataatsimiiffiusinnaasunik ilaneqarneratigut, 80 million koruunit taamaallaat atorneqarsinnaasut, illussanik titartaasarfik Tegnestuen Nuuk naliliivoq.
Inatsisartut siulittaasoqarfiata nutaamik ataatsimiittarfimmik sanaartortoqarnissaanut, aningaasat 190 million koruunit atugassatut naatsorsuutigaat. Tamannalu Nuummi innuttaasut akueriumanagu, sapaatip akunnerani kingullermi akerliussutsimik takutitsisoqarpoq inunnik 1200-t missaanniittunit peqataaffigineqartumik.
AAMMA ATUARUK VIDEO Inatsisartut Ataatsimiittarfissaata inissisimaffissaanut akuersaartut akerliusullu
Inatsisartut ataatsimiittarfiata oqoqalernerata kinguneranik taanna iluarsartuunneqartarpoq. Ataatsimiittarfilli nutarterlugu atorneqarsinnaalluartoq, illussanik titartaasartoq, Peter Barfoed oqarpoq.
- Nutaamik ataatsimiittarfiliornissamut maanna ataatsimiittarfiusup oqoqarsimanera pissutaatinneqarpoq. Taama iliornerup assigiinnarpaa, nutaamik bilitaartoqartoq biilimi arsaajaavik ulikkaaqqammat, Peter Barfoed aviisimut Politikenimut naggasiilluni oqarpoq.
Inatsisartut ataatsimiittarfissaata Nuummi sumi inissisimanissaa pillugu, Kommuneqarfik Sermersuup innuttaasunik taasititsinera ippassaq naammassineqarpoq. Maannamulli suli Radioaviisimit ilisimanngilarput, taasititsineq qanoq inerneqarnersoq.
