Tine Pars: Oqaatsinik piginnaasaqarnissaq pisariaqarpoq

Ilisimatusarfimmi ilinniarnissaminnik aallartitsisut 174-it Ilisimatusarfiup rektorianit Tine Parsimit ippassaq tikilluaqquneqarmata, ilinnialersut oqaatsinik atuinermut pikkorissuunissaat piumasaaqaataasoq ilinniarfinni assigiinngitsuni qulingiluani ilinnialersunut ilisimatitsissutigaa, tassa oqaatsit ilinniartitsissutigineqartut danskisut, tuluttut kalaallisullu piginnaaneqarfiginissaat piumasaqaataassalluni. Ilinniarnerup ilaa nunani allani aamma ingerlanneqarsinnaanissaa, Ilisimatusarfiup rektoriata aamma kajumissaarutigaa.
Allattoq Mads Lynge
septembarip 02-at 2014 15:22

- Oqaatsinik piginnaasaqarneq pisariaqarpoq ilinniassagaanni.

- Allassinnaaneq, oqaluttariarsorsinnaaneq, oqaatsit taakku pingasut qallunaatut, tuluttut kalaallisullu pisariaqarpoq. Tassa apeqqutaalluni ilinniagaq sorliunersoq, kisianni qallunaatut tuluttullu piginnaasat uagut ilinniarfitsinni amerlasuutigut pisariaqarput. Tassa ineriartornermut ilaaginnarpoq, inuiaqatigiillu ineriartornerannut ilaaginnarluni, Ilisimatusarfiup rektoria Tine Pars taama oqarpoq, imalu nangilluni:

- Inuiaqatigiinni ineriartornermut ilaaginnarpoq, ullutsinni paasisanik nutaanik pissagaanni oqaatsit assersuutigalugu kalaallisuinnaq aallaaviusinnaanngillat, Tine Pars oqarpoq.

- Kalaallit Nunaat ullumikkut ima inissisimavoq, siunissami kulturikkut ilisimasassatigullu paasisassanik assigiinngitsorpassuarnik annertunerujartuinnartumik nalaassaqartussaalluni. Tamakku ilaatigut pissutigalugit Ilisimatusarfiup ilinniakkat ilaat piffissami aalajangersimasumi pinngitsoorani nunani allani ilinniarneqarnissaat eqqussimavaa, Ilisimatusarfik tusagassiuutinut ilaatigut taama allappoq, Ilisimatusarfiullu rektoria ima itisiliivoq:

- Taamatut aaqqissuussineq ilinniartumut iluaqutaassaaqm nunani allani pissutsit paasiniassammagit, kisianni aamma soorlu pingaartinneqartorujussuuvoq Ilisimatusarfiup ilinniarfiisa qaffasissusaasa allanut nallersuussinnaanissaat. Taamaattumik internationaliseringimut ilaaginnarpoq, Ilisimatusarfimmi rektori Tine Pars oqarpoq.

Ilisimatusarfimmi ilinniarneqarsinnaasut katillutik qulingiluaapput, ilinniartullu 174-it ukioq manna septembarip aallaqqaataani ilinnialerput, assersuutigalugu taakkunannga 68-it ilinniartitsisunngorniartuullutik.