Timmisartuaqqamik periarfeerussamik ujaasineq aallartippoq

Timmisartuaqqap Kulusuup ungasinngisaaniinnissaa ullaaq ilisimagineqaraluarpoq, pilersaarutimmi malillugit mittussanngormat radiokkut attaveqarfigineqarsimammat. Innuttaasulli ilaata Kulusuup kitaatungaani timmisartuaqqamik takusimalluni saaffiginnissuteqarnerata kingorna ujaasiffissaq annertunerulerpoq, NaviAir KNR-imut taama ilisimatitsivoq.

Timmisartuaraq ataatsimik issimasoqartoq, NaviAir Press KNR-imut taama ilisimatitsivoq.

Timmisartuaqqamik, radari atornagu isigisat najoqqutariinnarlugit ingerlaartartumik, Islandimi Keflavikimit ippassaq aallartumik, ujaasinissaq anorlerpallaarnera putserpallaarneralu pissutigalugu kinguaattoorfiusimavoq.

Qulimiguulilli annaassiniut aamma Sikorsky, Kangerlussuarmit tikeqqammersoq, maanna aallartinneqarsimapput. Aammattaaq sakkutuut timmisartuannik Challengerimik ikiorserneqarnissamik noqqaasoqarsimavoq, kiisalu suliffeqarfik Air Zafari aamma ujaaseqataalluni.

Timmisartuaraq nalunaaquttap akunnerini marlussunni ingerlaqqinnissaminut orsussaqarsimassangatinneqarpoq, taamaammat nuna annertuupilussuaq ujaasiffigineqassasoq naatsorsuutigineqarsinnaavoq.

Islandimiut tv-qarfiat RÚV naapertorlugu timmisartumi aquttoq islandimiuunngilaq.