Timmisartoq tammaaneqartoq suli paasisaqarfigineqanngilaq
Timmisartuaraq namminersortumit pigineqartoq Islandimeersoq pineqarpoq, taanna radareqanngilaq, taamaallaallu biilernertut aqqutissaq igalaakkut isigineqarsinnaalluni. Qassinik issimasoqarnersoq NaviAirimit suli paasissutissiissutigineqarusunngilaq.
Timmisartuaraq Islandimeersoq ualimut marlunut Kulusummut mittussaagaluarpoq, sulili apuussimanani.
Radioaviisimit silaannakkut angallannermi aqutsisut oqaloqatigineqaramik oqaatigaat, timmisartuaqqamik ujaasineq aallartinneqareersoq, politiinilu ikiorserneqassallutik.
Kingullertut oqaatigineqarpoq, qulimiguulik ujaasiartortinneqartussaagaluartoq sila pissutigalugu qangattarsinnaasimanngitsoq. Nalunaaqutarlu arfineq marluk sioqqutitsiarlugu timmisartuaraq suli paasisaqarfigineqanngitsoq.
- Tamanna neriunartoqarpallaanngitsoq, Camilla Hegnsborg NaviAirimit Radioaviisimut oqarpoq.
Timmisartuaqqamik ujaasineq aqagu ullaakkut aallarteqqinneqarsinnaassaaq.
