Timersorneq Narsami ilinniarfimmi pingaartinneqartoq

Narsami Piareersarfimmi ilinniartut peqqinnarnerusumik inuuneqarnissartik pingaartitarilerpaat.
Allattoq Sara K. Jakobsen
septembarip 15-at 2014 14:18
Maaji 2014-imili Piareersarfik sapaatip akunneranut pingasoriarluni ilinniartunut timersortitsisalerlunilu peqqinnartunik nerisaqartitsisalerpoq, taamaaliornerlu ajunngitsunik malunniuteqareersoq, Narsami Pareersarfimmi pisortaq oqarpoq.
 
- Ataatsimoornerulerlutik aammalu ullaakkut eqiingallutik takkuttalernerat maluginiarsimavarput. Eqqissisimanerulerlutillu atuarfik qimaqattaartarunnaarpaat, Narsami Piareersarfimmi pisortaq Josef Petersen, KNR-imut oqarpoq.
 
Suliniut ”Timersorneq, nerisat peqqinnartut ilinniartitaanerlu”mik taaguuteqartoq, ilinniartut ilinniakkaminnut aallussillualernissaannik siunertaqarpoq. Piareersarfiullu suliniut 2014 tamaat ingerlassinnaaniassammagu Namminersorlutik Oqartussanit tapiiffigineqarsimavoq, ukiumut nerisaqarnermut 55.000 koruunit, taavalu timersornermut atortussanut timersortarfiullu attartorneqarneranut katillugit 70.000 koruunit tapiissutigineqartut, Josef Petersen paasissutissiivoq.
 
Suliniut sunniuteqarluartoq
Piareersarfimmi ilinniartup Georg Josefsenip suliniut ilinniagaqarnerminut iluaqutigalugu nuannaarutigalugulu oqaatigaa. 
 
- Nuanneqaaq. Atualeqqaaratta ullaakkut iterniutaa atuariartoraangatta, artorsartutut misigisarpugut. Timersortalerattali soorlu oqinnerusutut ittoq, Narsami Piareersarfimmi ilinniartoq, Georg Josefsen, taama oqarpoq.
 
Misilittakkat Piareersarfimmi ilinniartitsisunit iluarisimaarneqartut ukiup tulliani ingerlateqqinneqarnissaat
pilersaarutigineqarput.