Tele Post tillinniarfigiterujussuarpoq
Oqarasuaatit angallattakkat, fladskærmit, assiliissutit, qarasaasiaaqqat Ipadit assigisaallu ullaassaq tillinnneqarput, inuilli sunik maluginiagaqassappat? Tele-Postimi sulisoqarnermut pisortaq Karl-Henrik Simonsen aperaarput.
- Telefonit nutaat tuniniarneqartut alaatsinaafigissavaat. Nokianik, Samsunginik Sony Ericssoninik HTC-nillu tillinniarsimapput, kisianni aamma Ipadit marluk allaffissornermut atortakkavut tillinneqarsimapput. Taakku Telep ilisarnaataanik pilersorneqarsimapput, ilisarnaatit normullu peerneqaraluarpata takuneqarsinnaapput, Tele-Postimi sulisoqarnermut pisortaq Karl-Henrik Simonsen oqarpoq.
Ipadit allaffissornermut atorneqartartut taakku marluk inunnut ataasiakkaanut paasissutissanik mianernartunik imaqanngitsut, taassuma erseqqissaatigaa.
Tele-Post taamaasilluni sapaatip-akunnerup ataatsip ingerlanerani aappassaa tillinniarfigineqarpoq, ippassaanimi ullaassakkut tillinniartoqarmat isiginnaarut 42" LG tillinneqarami. Karl-Henrik Simonsen naapertorlugu malunnarpoq tillinnniat sunik sumilu tillinniassanerlutik nalusimanngikkaat, assilisammi tamanna uppernarsisimmassuk.
Nuummi politiit oqaatigaat ippassaq ullaassakkut tillinniartut 15-it 25-llu akornanni ukioqassangatinneqartut, kinaassusaalli paasineqarsinnaanngikkallarnerarpaat tillinniat kiinnatik assersorsimammatigit.
Tele-Postip taama annertutigisumik tillinniarfigineqarnera Nuummi politiit soorunami ilungersunartutut isigaat, paasiniaanissarlu soorunami pingaartillugu. Ilanngullugu erseqqissaatigaat tillitanik pisineq inatsisinik unioqqutitsinerusoq.
Taama tillinniartoqarnerata kingorna Tele-Postip kalerrisaarutinik nutaanik assiliissutinillu nutaanik ikkussuivoq.
- Kalerrisaarutillit pigaavut, kisianni allaffiit tillinniarmut atatillugu kalerrisaarutinik pilersorneqarnikuunngillat, tamanna pisariaqartorsuartut nalilernikuunngnnatsigu, kisianni tassa ullumikkut ikkussuipput, Tele-Postimi sulisoqarnermut pisortaq Karl-Henrik Simonsen oqarpoq.
Kikkut tillinniartuusimanerannik paasissutissanik tunniussisinnaasut Tele-Postimit 5000-it koruuninik akissarsitinneqassasut, taassuma ilanngullugu aamma oqaatigaa.
