Tasiusarmiut GM-imut annguttut
Unamminerup naammassinissaanut minutsit 15-iinnanngortut Eqaluk-54 ajornartorsiorpoq, taamaalineramini N-85 2-0-mik siuaqqammat.
Tasiusarmiulli straffertinneqarnerminni isertitsipput unamminerullu naammassiliivinnerani isertitseqqipput unamminerlu 2-2-mik naammassineqarluni.
- Nuanneqaaq soorunami. Ilarput taakka nuannapput, nuanneqaaq naak naligiiffiugaluaqisoq.
- Unamminerup immikkoortuani siullermi naligeeriarluta immikkoortuata aappaani 2-0-mik kinguaraluarpugut. Arsarnerput allanngortinnagu arsaratta unammineq naalivissoq målit marluk iserput qujanaavissumik, annguppugullu.
N-48-p Eqaluk-54-illu anngunniuullutik unamminerat pillugu Qanoruumi ilanngutassiaq uani isiginnaarsinnaavat.
- Oqiliallangaaratta nuannaangaaratta allaat tasersuarmut nalukkiarpugut, Minik Stephensen, anfører i Eqaluk 54-imi aqutsisoq KNR-imut oqarpoq.
K-33-p arsartui qasujartornertik malugaat
Unamminerummi siuliani hjemmebanertut K-33 anngunnissaminut periarfissaqaraluarlutik Paamiormiunut Nattoralimmut 1-2-mik ajorsarput.
- Arsartut qasujartornerat aamma malunnarami. Unamminerit ingerlatiinnaavillugit tamatta qasujartortaratta . Soorunami ajugaarusukkaluaqaagut, kisiat ajoraluartumik ajorsarpugut, K-33-p sungiusaasua, Inunnguaq Enoksen, ajuallassimalluni oqarpoq.
K-33-ermiut pissartanngorniunnermi peqataasinnaajunnaarnertik naammagiinnartariaqarpaat.
- Ajoraluartumik timersorneq tassa taamaattarpoq. Timersorneq qanorluunniit pisoqarfiusarami. Tamatta ajugaarusuttaratta ajorsarusunnatalu, K-33- sungiusaasua, Inunnguaq Enoksen oqarpoq.
Angutit pissartanngorniuunnissaat Nuummi aggustip sisamanni aallartissaaq.