Tasiilami suliffissaaleqisut ikileriarput
Tasiilami suliffissaaleqisut ikileriarsimapput. Ukioq kingulleq 2013-imi Tasiilami suliffissaaleqisut 311-upput, ukioq mannalu suliffissaaleqisut 227-ullutik. Tasiilami nunaqarfinnilu katillugit 3000-it sinnilaarlugit innuttaassuseqartuni suliffissaaleqisut 84-nik ikileriarsimapput.
Kommuneqarfik Sermersuumi suliffissarsiuussisarfimmi pisortat sooq Tasiilami suliffissaaleqisut ikileriarsimanersut nassuiaatissaqartinngilaat. Tasiilamili suliffissarsiuussisarfimmi siunnersortip nassuiaatissaqartippaa.
- Innuttaasut ilai suliffinnut piginnaanngorsarnissaannut suliffeqarfinnut assigiinngitsunut innersuuttarpagut, Tasiilami suliffissarsiuussisarfimmi siunnersorti Anita Kristiansen oqarpoq.
Taassuma aamma ilanngullugu oqaatigaa inuusuttut ilinniariartarneri, innuttaasullu kitaanut nuuttarneri suliffissaaleqisut ikileriarsimaneranut peqqutaaqataasinnaasut.
Tasiilami suliffissaaleqisut 12-it suliffeqarfinni Pilersuisumi Tele-Postimi, allanilu suliffeqarfinni namminersortuni piginnaanngorsarneqarput.
Tasiilami innuttaasut 45-nik amerleriarsimapput. Ukiullu qulit ingerlanerani innuttaasut 238-nik amerleriarsimallutik. Tasiilaq illoqarfittut alliartorpoq. Inissat qulit sanaartorneqassapput, nutaamillu meeqqerivimmik sanaartortoqassalluni.
Suliffissaaleqisut kommunemut nalunaarsimasut Naatsorsueqqissaartarfimmi kisitsisit nalunaarsorneqarsimapput.