Tarnip pissusaanik ilisimasalik: Nalunaarusiornerit naammaleqaat

- Nunaqarfiit qiviarneqarnerusariaqartut isumaqarpunga. Meerarpassuaqarpoq illoqarfimmiutut periarfissaqanngitsut, tarnip pissusaanik ilisimasalik Trudy Høy Kreutzmann, Misi Kujallermeersoq oqarpoq.
Taassuma meeqqanik atornerluineq sumigiinnaanerlu akiorniarlugit sulineq suliaasa ilagaat.

Trudy Høy Kreutzmann, Kommune Kujallermi meeqqat atuartut ulluinnarni sullitarai. Taassuma maluginiarsimavaa meeqqat tarnip pissusaanik ilisimasalinnut innersuunneqarsimagaangata passunneqarlutillu, taavalu meeqqap qanoq iliuuseqarfigeqqinneqarnissaanut inassuteqartoqarsimagaangat, inassutit taakku nunaqarfinni malinneqarsinnaaneq ajortut sulisunik amigaateqarneq pissutaalluni.

Katuami ataatsimeersuarneq nunat avannarliit meeqqanik atornerluinermik sumiginnaanermillu pinaveersaartitsinernik suliaqartut kattuffiannit, NFBO-mit,  aaqqissuunneqarpoq ullumilu naammassissalluni.

- Meerarpassuaqarpoq illoqarfimmiutut periarfissaqanngitsunik. Atuarfimmi ilinniartitsisunik amigaateqarput. Inunnik isumaginninnermik sulialinnik amigaateqarput. Nunaqarfimmiut katakkaluttuinnarpagut, tamannalu annilaanngassutigisarpara. Meeqqat nunaqarfimmiut atugarisaat aaqqiiviginiarlugit piaartumik iliuuseqartariaqarpugut. Illoqarfimmiutut periarfissaqartariaqaraluarput, Trudy Høy Kreutzmann oqarpoq.

Taassuma tarnip pissusaanik ilisimasalinnik nunaqarfinniiitoqartannginnera, meeqqallu taama ilisimasalinnik pisariaqartitsisut illoqarfinnukaqqaartariaqartarnerat uggoraa. Tarmip pissusaanik ilisimasallit taamaasillutik ilisimasariaqakkatik meeqqanut tunngasut tamakkiisumik paasineq ajoramikkit, pitsaasumik sullissinnaaneq ajorpaat.

Meeqqat qanoq innerannik allatut ajornartumik nalunaarusiuinnartariaqartarput nunaqarfimmilu qanoq pineqarnissaannik inassuteqaasiorlutik, inassuteqaatilli taakku malinneqarsinnaasarnatik, inunnik isumaginninnermik sulialinnik amigaateqarneq pissutaalluni,
tamannalu aaqqinneqartariaqarpoq.

- Kommunip iluani immikkoortitaarnata ataatsimut sulisariaqarpugut ajornartorsiut aaqqiiviginiarlugu, Trudy Høy Kreutzmann oqarpoq.

Taassuma nunaqavissut ilisimasaat atorneqarnerunissaat kissaatigaa. Tassani eqqarsaatigaa, Ilisimatusarfimmi inunnik isumaginninnermut tunngasunik ilinniartut misissuinerit suliarisartagaat avammut saqqummiunneqarnerusinnaasut, nunaqavissut ilisimaligaat, nunatta avataani ilisimatussutsikkut paasisanut, ilassutitut atorneqarsinnaammata.