Tarnimikkut nappaatillit kommunip ikiugassarai
Namminersorlutik Oqartussat inissiaataanni inuit inissianut Kommunimiit inissaminnik innersuunneqartartut ilaat, nammineq imminnut paarinissaminnut piginnaasaqartuuneq ajortut, taamaammallu inini ataatsimoorluni najugaqarfiusuni imaluunniit pisortat ingerlatsiviini paaqqutarinniffinni nakkutigineqarlutik najugaqartariaqaraluartut, INI siusinnerusukkut erseqqissaassuteqartarnikuuvoq.
- Tarnimikkut napparsimasunut amigartumik ikiorsiisoqartarnera ajornartorsiutaavoq annertusiartortoq. Taamaammallu INI-p tungaanit Ineqarnermut Naalakkersuisoqarfik qinnuigineqarsimavoq ajornartorsiut Kommuneqarfik Sermersuumut qaqinneqassasoq. Ineqarnermut Naalakkersuisoq Siverth K. Heilmann KNR-imut allappoq.
AAMMA ATUARUK Inatsisartut ombudsmandiata tarnimikkut nappaatillit pineqarnerat misissuiffiginiarlerpaa
Ineqarnermut Naalakkersuisoqarfiup tarnimikkut nappaatillit inissianit attartortakkanit nalinginnaasunit nuutsinneqarnissaannik kommunimut piumasaqaateqarnermigut inuttut pisinnaatitaaffiit unioqqutippai. Tamannami Naalagaaffiit Peqatigiit inuttut pisinnaatitaaffiit pillugit isumaqatigiissutaannik unioqqutitsinerusoq, Naaja Nathanielsen isumaqarpoq.
Tassunga Ineqarnermut Naalakkersuisoq akivoq, Kommuni pisussaaffeqartoq tarnimikkut nappaatilinnik ikiorsiissalluni tapersersuissallunilu. Tamannalu naqissuserneqartoq innarluuteqartut pillugit Inatsisartut peqqussutaanni aammalu FN-ip innarluutillit pillugit isumaqatigiissutaani.
AAMMA ATUARUK Naaja N. Naalakkersuisunut inissiat pillugit isorinnittunik apeqquteqalersoq
- Taamaammat INI Kommunimut saaffiginnittarpoq pisuni taamaattuni ikiorneqarnissamik noqqaassuteqarluni – taamaattoqartaraluartorli Kommuni naammattumik iliuuseqarneq ajorpoq.
- Pakatsissutigaara, Kommuneqarfik Sermersooq tarnimikkut nappaatillit ilaannut naammattumik ikiorsiisanngimmat, tamatumami qulakkiissagaluarmagu piffissaagallartillugu ikorneqarnissaat.
- Tarnimikkut nappaatillit mianersoqqussummik tunineqareerlutik inigisaminnit anisitaasariaqartarnerannut taarsiullugu Kommunip isumagisariaqaraluarpaa najugaqarfissaanik naleqquttunik tunissallugit, taamaaliornikkut avatangiisiminnut akornusersuinissaat ingalassimatinneqarsinnaaqqullugu aammalu pisariaqartitartik malillugu ikiorneqarlutillu tapersersorneqarsinnaaniassammata. Naalakkersuisoq KNR-imut allappoq.
AAMMA ATUARUK Tarnimikkut nappaatillit aqqusiniinnarmut innersuutissallugit siunertaqanngilaq
Ineqarnermut Naalakkersuisup, Siverth K. Heilmannip, kissaatigaa kommunip Namminersorlutik Oqartussat, INI Iserillu suleqatigalugit siunissami suliat taamaattut qanoq aaqqinneqartassanersut eqqartussagaat.