Tamanut imermik kuuinnartoqanngilaq suli

Nunatsinni illut tamarmik kuuginnartunik suli imeqanngillat. Tassalu inuppassuit imissaqarumallutik suli imertartarlutillu nilattartarput.

Doris Jakobsennip tamanna allanngortinniarpaa.

Taamaammat Siumut sinnerlugu inatsisartuni ilaasortaq siunnersuuteqarpoq, pisortat inissiataat attartortakkat A/S INI-p aqutai tamarmik imermut attavilersornissaannut pilersaarusiortoqassasoq.

- Peqqinnissaq eqqarsaatigalugu imermik attavilersuinissaq pingaaruteqarpoq, inuiaqatigiit ilaqutariit peqqinnerusumik inuunissaat eqqarsaatigalugu, Doris Jakobsen oqarpoq.

Misilittakkalli naapertorlugit pilersaarusiorneq akisuvoq.

Naalakkersuisut akissuseqaatiminni ilaatigut allapput  Ikamiuni imeqarnerup misissornerissaannaa Nukissoirfinnut 400.000 koruuninik aningaasartuutaassaaq. Inuit aamma kuuinnartumik imeqaleraangamik imermik atuinerusalertarsimapput, taamaammallu aamma, erngup igitassap eqqarsaatinut ilaanissaa pisariaqartoq.

- Illorparssuit pineqarput. Misissuititsineq taanna qanoq akeqassava? Tassani uagut isumatsinni tulluarnerusutut isigigatsigit, aamma akisussaassusilimmik taamalilluta ingerlassagatta, avatangiisinut pinngortitamullu naalakkersuisoq, Kim Kielsen, siunnersuutip suliarineqanngilaattaa naammattuugarput taaam oqarpoq.

Doris Jakobsennili siunnersuutimi oqaluuserineqarnera nuannaarutigaa, aamma allanngortinneqalaaraluartorluunniit.

- Uanga siunnersuutiginikuuara pilersaarusiortoqassasoq, kisianni naalakkersuisut allannguutissamik siunnersuussaani oqariartuuteqarput misissuisoqassasoq qanoq pilersaarusiortoqassappat akeqassanersoq. Isumaqarpunga siunnersuut uninngatinneqaannarnani itigartinneqaannarnani alloriaqqittoqarmat nuannaarutissaasoq. Aamma suliaq aallartinneqartariaqarpoq, iliuuseqanngikkutta siunissami pissutsit taamaaginnartussaammata, Doris Jakobsen oqarpoq.