Takornarianut akitsuut peerniarneqartoq

Inatsisartut 2008-mi takornariat umiarsuarmik tikittartut akiliutigisartagaat 525 koruunininut annertusinikuuaat. Taamatut aaliangernerup kinguneraa, takornariat umiarsuarmik tikittartut 30 procentinik ikileriarput.
Tamanna Naalakkersuisut iliuuseqarfiginialerpaat. Akiliutaasartoq nunat allat unammillersinnaasariaqarai, Aleqa Hommond isumaqarpoq.

- Nassuerutiginninneruvoq, imatut taasillugu nunanut allanut sanilliulluta akisuallaaqaagut. Taamaattunik qammaanissarput kajuminnarnerussappat akitsigut tulluussartariaqarpugut. Naatsorsuutigaarput akit apparneratigut takornarissat Nunarput toqaartalissagaat, Aleqa Hammond KNRimut oqarpoq.

Nammineq akitsoriarlugu akikilliniaraa

Aleqa Hammondi aningaasaqarnermut naalakkersuisuugallarami akitsuutit pineqartut akitsornissai siunnersuutiginikuuai. Aamma Aleqa Hammondi akileraartarnermut akitsuusersuinermullu ataatsimiitsitaliami issiagallarami akitsuinissamut siunnersuut suliarinikuuaat, partiinillu tamanit taperserneqarluni.

Akitsuut taanna 2010-miit 2013-imuttakornariat 8500-nik ikileriarnerannut pissutaaqataavoq.

Tamanna pillugu akitssuut Naalakkersuisunit peerniarneqartoq, Inatsisartunili isumaqatigiinniutigineqassasoq Aleqa Hammond oqarpoq.

Akitsuut maasakkut atuuttoq peerniarneqarpoq. Tamannali isumaqanngilaq takornariat Nunatsinnut akiliisarunnaassasut. Naalakkersuisut siunertaraat umiarsuit usitussusaat aallaavigalugit akitsuusersuisalernissaq.

Taamaaliortoqassappat 2008-miit takornariat ikiliartornerat ilorraap tungaanut saatsinneqarsinnaavoq.
 
- Susassaqartut qanoq siunnersuuteqarnersut tusaaniartuaannarpagut. Taakkualu susassaqartut tusaaniarnirasigut taamatut siunnersuuteqarpugut. Siunnersuutitta nassatarissavaa unammillikkatsinninngaanniit kajuminnarnerunissarput, Aleqa Hammond oqarpoq.