Taasititsinerup inernera erseqqissoq - Aqqaluup Aneerasaartarfianiissanngilaq

Kommuneqarfik Sermersuup taasititsinerani peqataasut 3 procentiinnaat Inatsisartut ataatsimiittarfissaata Aqqaluup Aneerasaartarfiani sananeqarnissaa kissaatigaat.
septembarip 03-at 2014 09:07

Isumasiusarfiup Epinionip illoqarfiit pingaarnersaanni internettikkut aammalu apersuilluni isumasiuinerani peqataasunit 2880-init inuit 74-iinnaat, tassalu 3 procentit, Aqqaluup Aneerasaartarfia piukkuppaat.
 
Tamannalu pissutigalu borgmesterip Asii Chemnitz Narupip tassani sanaartortoqarnissaa itigartitsissutigaa.
 
- Aqqaluup Aneerasaartarfia periarfissatut isigiunnaarpara, sumiiffillu taannaannaq Inatsisartut Siulittaasoqarfianit maannamut qinnuteqaatigineqarsimalluni, Asii Chemnitz Narup tusagassiorfinnut nalunaarummi taama allappoq.

 

Oqaaseqaatit erseqqissut

Nuummi innuttassut taasititsinermi toqqarsinnaasaat tassaapput Aqqaluup Aneerasaartarfia, Nuutoqaq, Tamaasa naaggarpakka imalunniit Naluara.
 
amerlanerpaartaasalu - inuit 1664-it imaluunniit 58 procentit - Inatsisartut nutaamik ataatsimiittarfittaarnissaat kissaatiginngilaat. Taakkumi toqqarpaat "Tamaasa naaggaarpakka” amerlasuullu nutaamik sanaartortoqarnissaa akerleralugu oqaaseqaateqarsimapput.
 
- "Isumaqarpunga suliniutiginiarneqartoq akisuallaartoq. Aningaasat pingaarnerusunut atortariaqarpagut. Maanna ataatsimiittarfiusoq nutarnerneqaannarli imaluunniit allilerlugu, taamaaliornikkummi aningaasat taama amerlatigisut atorneqarnavianngillat", ilaat taama allappoq.
 
- "Kalaallit Nunaat sunut tamanut akissaqanngilaq. Sutigut tamatigut sipaarniartariaqarpugummik oqartoqartarpoq....kisiannilu inatsisartut ataatsimiittarfissannik nutaamik sanaartortoqarniarluni??? Soormi aningaasat atuarfinnut, utoqqaat illuinut imaluunniit "pissakinnerusut" atugarissaanerulernissaannut atorneqaaannarunik?", alla allappoq.

Epinionip nalunaarusiaa tamakkerlugu uani atuarneqarsinnaavoq

 

- Piumaneruara: Inatsisartut ataatsimiittarfiat tassaniitiinnarlugu aningassallu sipaarlugit, alla aamma allappoq.
 
Inuit 79-it Nuutoqaq toqqarsimavaat, 36 procentit imaluunniit inuit 1025-it Arsiffik piukkullugu. Inuillu 39-t Naluara toqqarsimavaat.

 

Inatsisartut aalajangigassaraat

Borgmesterip Asii Chemnitz Narupip innuttaasut taama amerlatigisut taasititsinermut peqataasimanerat nuannaarutigaa.
 
- Internetti atorlugu innuttaasut peqataatinneqarnissaannik misiliineq una siullersaavoq, isumaqarpungalu nutaaliorneq tamanna innuttaasut ilassinnilluarsimanerannik takutitsisuusoq”, oqarpoq.
Innuttaasut internetti aqqutigalugu aalajangiinissani pingaarutilinni peqataatinneqartarnissaanni manna naggataajunngitsoq borgmesterip qularutiginngilaa.

Nalunaarusiami 157-inik qupperneqartumi oqaaseqaatigineqartut tamaasa borgmesterip atuarsimavai nutaamillu sanaartortoqarnissaata isorineqarnera tusaatissatut tigullugu. Sanaartortoqarnissaanulli aalajangiinissaaq allarluinnarmiippoq.
 
- Inatsisartut ataatsimiittarfiliuunneqarnissaat pillugu Inatsisartut aalajangernikuupput, nunattalu karsia tamatumani akiliuteqartoqartussaavoq. “Uagut qinnuteqaatit pissarsiarisavut tunngavigalugit taamaallaat iliuuseqarsinnaavugut”, Asii Chemnitz Narup oqarpoq.