Suliffissaaleqisunut kisitsisit nuannaajallannartoqalaarput

Kisitsisit nutaat Nunatsinni suliffissaaleqisunut tunngasut immannguaannaq nuannaajallannartoqarput.

Naatsorsueqqissaartarfiup ukiormanna marsimi suliffissaaleqisut amerlassusii saqqummiuteqqammerpai, taakkulu 4.385-iupput.

Siorna marsimi suliffissaaleqisut 3.946-uupput.

Taamaalilluni suliffissaaleqisut siornamut naleqqiullugit 439-nik amerleriaateqarput.

Illoqarfinni ataasiakkaani marsimi suliffissaaleqisut siornamut naleqqiukkaanni, Qaqortumi Tasiilamilu taamaallaat ikileriarput.

Tamatuma akerlianik Qaasuitsup Kommuniani illoqarfinni Uummannami, Ilulissani ingammillu Qeqertarsuarmi aamma Qasigiannguani suliffissaaleqisut amerleriarsimaqaat.

Illoqarfinni kingullerni marlunni taaneqartuni suliffissaaleqisut 2013-imi marsimut naleqqillugit marloriaatinngungajassimapput.

Aamma Nuummi, Paamiuni Narsamilu suliffissaaleqisut amerleriarsimapput, illoqarfinnili sinneruttuni suliffissaaleqisut siornamut naleqqiullugit allannngoriaateqangaarsimanatik.

Suliffissaaleqisulli ukiormanna februaarimut naleqqiullugit ikilerialaarsimapput.

Februaarimi suliffissaaleqisut 4.420-oriarlutik marsimi 4.385-iupput - tassa taamaalilluni suliffissaaleqisut ukiormanna februaarimit marsimut 35-nik ikileriaateqarput.