Steen Lynge: Aqqaluup Aneerasaartarfia ataatsimiittarfiliorfiginagu

Inatsisartut ataatsimiittarfissaa, Nuutoqqami Aqqaluup Aneerasaartarfianiittinneqassanngitsoq, Naalakkersuisunut ilaaasortap, Steen Lyngep neriuutigaa oqarluni, tamassumunnga inuit 1200-it missaanniittut akerliunerat, Kommuneqarfik Sermersuumi kommunalbestyrelsemut ilaasortanit tusaaniarneqarumaartoq.
aggustip 26-at 2014 10:12

- Inatsisartut ataatsimiittarfissaata sumi inissinneqarnissaa pillugu, nammineq inuttut isummerfigivara, Nuutoqqamiisinneqassappat tamanna akerliuffiginiarlugu, tassalu maanna taamaaliorlunga, Steen Lynge Radioaviisimut ullumi oqarpoq.

Taassuma taama isummersimanera parteeqataata, Knud Kristiansenip ataqqillugu oqaatigaa.

- Steen Lyngep taama isummernera pitsaasutut isigaarput, tassami Atassummi assigiinngitsunik isummertarneq inissaqartinneqartarpoq. Atassummiit erseqqissaatigissavarput nunaminertaq, Aqqaluup Aneerasaartafia Inatsisartut ataatsimiittarfissaata toqqavissaattut siunnersuutigineqartoq, ilumut tulluartuunersoq, Knud Kristiansen oqarpoq.

Inatsisartut ataatsimiittarfissaat pillugu Inatisartut 2013-imi novembarip 27-anni taasitinneqarneranni, ilaasortat amerlanerussuteqartut tamatumunnga isumaqataapput. Tamatumalu kingorna Kommuneqarfik Sermersooq siunnersuuteqarpoq, ataatsimiittarfissap sumi inissinneqarnissaanik, taakkulu tassa ilagaat Aqqaluup Aneerasaartafia Nuutoqqamiittoq.

Tamannali Nuummi innuutaasunit paasineqarmat, suleqatigiit 'Nuummit Eqqaamasat' pilersinneqarput, siunnersuummut akerliunertik takutinniarlugu. Aasallu ingerlanerani akerliussutsimik takutitsisoqarluni, taakkununnga ilaalluni Naalakkersuisunut ilaasortaq, Steen Lynge.

Sapaatip akunnerata kingulliup naanerani akerliussutsimik takutitseqqittoqarpoq, tamatumuuna inuit 1200-it missaanniittut peqataaffigisaannik. Taama amerlatigisut peqataanerata kinguneranik, Naalakkersuisunut ilaasortap, Steen Lyngep Kommuneqarfik Sermersuumi kommunalbestyrelsemut ilaasortat qinnuvigai, innuttaasut taama amerlatigisut oqariartuutaat tusaaniaqqullugu.

- Kommuneqarfik Sermersuup aalajangertussaavaa ataatsimiittarfissap sumi inissinneqarnissaa. Taamaattumik neriuutigaara Kommunalbestyrelsemi ilaasortat amerlanerussuteqartut akerliussutsimik takutitsinerit, maannamut marluusut inuppassuarnillu peqataaffigineqartut, isumaat ataqqisariaqaraat, Steen Lynge oqarpoq.

Taassuma parteeqataata, Knud Kristiansen oqarpoq, Inatsisartut ataatsimiittarfeqalernissaat tunngaviusumik Atassummit isumaqatigineqarmat oqarlunilu Inatsisartut Nunatsinni ataqqinartumik ataatsimiittarfeqartariaqartut. Knud Kristiansen nangilluni ima aamma oqarpoq.

- Atassummit naalarnisimavarput nunaminertaq sorleq innersuunneqassasoq. Nunaminertarlu maanna innersuunneqattunut ilaasoq tusaratsigu, tamanna nalilersugassatut tiguarput. Oqaatigissariarporli Inatsisartut nutaamik ataatsimiittarfeqalernissaat Atassummit tunngaviusumik isumaqatigigatsigu.

Inatsisartunut ilaasortaq, Knud Kristiansen, Atassut taama oqarpoq.