Statoil tunniutiinnarnianngilaq
Cairnip Kalaallit Nunaata imartaani misileraalluni uuliasioraluarnera angusaqarfiunngitsoq norskit uuliasiortitseqatigiiffiata, naalagaaffimmit pigineqartup, Statoilip, qunulliutiginngilaa. Statoilimi pisortaaneq, Helge Lund, taama oqarpoq.
Kalaallit Nunaanni uuliasiornissamut akuersissutit pigeriikkamik atornissaat naatsorsuutigigaat erseqqissaatigineqarsimavoq, uuliasiorfissaminnillu nutaanik 2012-ip naalernerani immaqa aamma neqerooruteqassasut, nutaarsiassaqartitsivimmi Bloombergimit allaaserineqarpoq.
- Tunniutiinnarnavianngilagut. Issittumi sumiiffiit ilikkariartortillugit, qillerisarnittalu teknikkii ineriartortillugit, Issittumi misileraasarnerput aamma pitsanngoriartussaaq, uuliasiortitseqatigiiffissuit nunarsuarmi tamaneersut Qatarimi illoqarfimmi Dohami ataatsimeersuarneranni Helge Lund oqarpoq.
- Kalaallit Nunaata imartaani qillerinissarput suli piareersarparput, Cairnillu qillerinermini ukiuni kingullerni marlunni misilittagai sapinngisamik ilinniarfigerusoqaagut, Statoilimi pisortaaneq nutaarsiassaqartitsivimmut Bloombergimut oqarpoq.
Taassuma ilutigalugu erseqqissaatigaa, uuliamik qillerisarnernut politikerit avatangiisinillu illersuiniat qularutiginninnerisa uuliasiortitseqatigiiffiit Issittumi uuliasiornissaat pinngitsoortinnavianngikkaat.
- Avatangiisinut ajoqutaanngitsumik misileraalluta qillerisarutta, aningaasanillu atorluaagutta, politikerit avatangiisinillu illersuinianit tapersersorneqalissaqaarpugut, Helge Lund, Statoilimi pisortaaneq, Qatarimi ippassaq ataatsimeersuarnermi oqarpoq.
