Stafettimut peqataasinnaasut naammatsipput

Aappassaa suliffeqarfiit inuillu ataasiakkaat DHL TELE POST stafettimi peqataasinnaapput Nuup illoqarfiata qeqqani arpaffigineqassalluni 5 x 5 kilometeri. Arpanneq taanneqartarpoq nunarsuarmi timigissarluni arpannerit pitsaanersaattut Nuummilu pisussaq DHL-mit, TELE-POST-imit, NS-84-mit Grønlandsbankenimillu aaqqissuunneqarpoq. DHL-ip aamma TELE-POST-ip ukioq manna stafet-ernermut juunip arfernani nal. 17.00 aallartittussamut peqataasinnaasut naammatsinnerat nuannaarutigalugu nalunaarutigisinnaavaat.
Allattoq Simon Uldum -
juunip 04-at 2013 11:50

Arpaqatigiikkuutaartussatut nalunaartut tallimanngormat 100-t anguaat, tassalu aaqqissuisut ukioq mannamut angorusutaat. Siorna arpaqatigiiaat 72-iupput.

Arpanneq Naalakkersuisut siulittaasuata Aleqa Hammond-ip seqqorneratigut aallartisinneqassaaq.

DHL TELE-POST Stafetten arpaqatigiikkaartunik 100-nik peqataasulik, taamaalillunilu 500-nik peqataasulik tassaalersimavoq Kalaallit Nunaanni timigissaatigalugu arpannerit  annersat ilaat.

- Stafettip ukiuni pingasuinnarni angusimasaata tapersersorneqarluarnera nuannaarutigeqaarput, Sulisoqarnermut pisortaq Karl-Henrik Simonsen oqarpoq.

Taanna nammineq scene-miittussaavoq pisarneq malillugu TELE-POST Band Nuuk Byorkester aammalu nipilersoqatigiit ”the påhængsmotors”-ikkut peqatigalugit Inussivimmi nipilersulerpata.

Aaqqissuisut taamaammat neriuutigaat ilaquttat, ikinngutit aammalu suleqatit arpattunik tapersersuiartorluarumaartut nuannisaaqatigiillutillu.

DHL TELE-POST Stafetti aaqqissuunneqassaaq sisorartartut peqatigiiffiat NS-84 peqatigalugu, taakkulu aamma isumagissavaat meeqqanut pississaarfeqarnissaa kiisalu nerisassanik imigassanillu pisiassaqarnissaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq