Siusinaartumik tusarniaaneq sapaatip akunneri tallimat qaangiuppata naammassissaaq

Tassalu tamannarpiaq Nunatsinni innuttaasunit sunniuteqarfigineqarsinaalersoq, Inuussutissarsiornermut Aatsitassaqarnermut Suliffeqarnermullu Naalakkersuisoq, Jens Erik Kirkegaard oqarpoq.
 
- Siusinaartumik tusarniaanerup sunik imaqarnissaa innuuttaasunit maanna sunniuteqarfigisinnaanngorpaat, Jens Erik Kirkegaard oqarpoq.
 
Kujataani Kuannersuarni aatsitassarsiornissap pilersaarusiorneranut sunniuteqassagaanni, sapaatip akunneri tallimat qaangiutinnagit, tassa oktobarip arfernagat nallertinnagu siunnersuuteqartoqarsinnaavoq.
 
Inatsisartut upernaaq ataatsimiinnerminnni inatsisitut nutaatut aalajangiuppaat, pilersaarutinut annertuunut inuiaqatigiit annertunerusumik sunneeqataasarnissaat. Tamanna pillugu Aatsitassaqarnermut Naalakkersuisoq ima oqarpoq.
 
- Taama sunniuteqarsinnaanngornerup allaanerussutaa annertunerpaaq tassaavoq, aatsitassanik piiaanissamut qinnuteqavinnissap tungaanut, innuttaaasut siusissukkut periarfissinneqassammata, piiaanissami sorpiaat nalunaarusiornermut ilaatinneqassanersut, taamaalilluni innuttaasut pitsaanerpaamik peqataatinneqarnissaat maanna periarfissaalerluni.
 
Pilersaarutinut sunniuteqarsinnaanngornerup saniatigut, Nunatsinni inuiaqatigiit inatsisitigoortumik aamma periarfissinneqarput, pilersaarutit annertuut pillugit qaammarsaanissamut aningaasanik qinnuteqartoqarsinnaanngornera. Tamanna Inatsisartut upernaaq ataatsimiinnerminni aamma aalajagiiffigaat.
 
Siusinaartumik tusarniaaneq naammassippat, Kuannersuarnilu aatsitassarsiortussap, Greenland Minerals and Energyp pilersaarutaat ataatsimut tusarniaassutigineqareerpata, aatsitassarsiorfik ukiut arlallit aatsaat qaangiuppata aallartissinnaassasoq, Jens Erik Kirkegaard oqarpoq.
 
- Assigiinngitsut piumasaqaatit soorlu avatangiisinut tunngasut, innuttaasunut piumsaqaatit assigiinngitsut inuiaqatigiinnullu iluaqutissat, GME naammassisinnaappagit, qinnuteqaataallu tusarniaassutigineqareerpat tamatumalu kingorna paasineqarpat maleruagassat tamarluinnaasa naammassineqarsimasut taava aatsaat GME akuersissummik tunineqarsinnaavoq. Kisianni qaqugu aallartissanersut maanna suli oqaatigiuminaappoq, immaqa aatsaat ukiut marluk qaangiuppata aallartissinnaassasut naatsorsuutigineqarsinnaavoq.
 
Inuussutissarsiornermut Aatsitassaqarnermut Suliffeqarnermullu Naalakkersuisoq, Jens Erik Kirkegaard oqarpoq.