Siumut qinersimagukku uranimik naaggaarluinnarnerup atuutsikkunnaarnissaa qinersimassavat

Inatsisartunut qinersinermi kingullermi Siumumup taasisoq, Piitannguaq Tittussen  allatut isumaqarpoq. Taassuma tupaatigivaa uranimut naaggaarluinnarnerup atuutsikkunnaarneqarnera nalusaminik qinersimagamiuk.

- Oqarsimasuuppata 0-toleranci uagut atuutsikkunnaassavarput Siumummut qinersigussi, taava uanga ataatsimilluunniit eqqarsanngiivillunga qinersimanavianngikkaluarpakka. Taamak ersaritsigisumik oqaatigisinnaavara.

Piitannguaq Titussen taama oqarpoq. Taanna isumaqarportaaq, Naalakkersuisut uran pillugu isumaat qinersinermut sanilliunneqartariaqanngitsoq.

- Inatsisartunut qinersineq , Inatsisartunut qinersineruvoq. Uran pillugu 0-toleranci pillugu ataatsimilluunniit qinersinerunngilaq.

Tittusen taama oqarpoq, Inatsisartunullu qinersinerup nalaani  Naalakkersuisut  neriorsuutsiminnik unioqqutitsisimanerarlugit pasivai.

- Aamma qinersisoqalermat Jens-Erik Kirkegaard Aleqa Hammondikkullu neriorsuutigisaqattaarpaat, annertuumik mingutsitsisoqassappat taava aallartinnissaat orniginannginnerarlugu.

Jens-Erik Kirkegaardip nalunaarutaa, Sara Olsvigip aamma e qqumiigaa, taanna  isumaqarpoq iluamik akineqarnani.

- Naalakkersuisut oqarput Inatsisartunut qinersinerup inernera tassaasimasoq tusarniaanerup inernera, tamannalu isumaqatiginngilluinnarpara. Inatsisartunut qinersisoqarmat soorunami allaqqasoqanngilaq Urannimut aappeerpunga, imaluunniit urannimut naaggaarpunga. Oqaannartoqarsinnaanngilaq Inatsisartunut qinersineq, tassaasoq urannimik aappimik naamimilluunniit aamma taasinerusoq.

Sara Olsvig aamma isumaqarpoq, inuiaqatigiit iluamik paasiniaavigineqarsimanngitsut.

- Saniatigut oqarsinnaavugut akissutiminni uani taakkartuipput assigiinngitsunik pinikuusunik tassa paasititsiniaanerit, uanilu pingaaruteqartorujussuuvoq ilanngutissallugu, paasititsiniaasoqareeraangajuna tusarniaasoqartartussaasoq. Uanili tamanna suli pinngivippoq, Sara Olsvig taama oqarpoq.