Siumumi politikerit nuimasut ikummatissat akitsuuserneqarnerat akerleraat
Allaat Naalakkersuisut akitsuinermut akuersisimanerat tunuarteqqullugu.
Allagaqartut isumaqarput akinik qaffaanerit inuiaqatigiinni tamat eqqorumaaraat, ingammillu pissakinnerusut annertuumik eqqorumaaraat. Siumut sinnerlugu inatsisartuni ilaasortat isumaqarput Naalakkersuisut siulleq pitsaaneq toqqarsimagaat, innuttaasullu akiliisussanngorlugit.
- Tamanna Siumut Siumulluunniit partiitut akuersaarsinnaanngilaa, Jens Immanuelsen Kark-Kristian Kruse-lu allapput. Taakku isumaqarput Naalakkersuisut akinut qaffaataasunut matussutissanik Landskasse-mi nassaartariaqarput. Innersuussutigalugulu suliffeqarfinnik Namminersorlutik oqartussat pigisaannik tuniniaaneq periarfissaasoq.
Siumumi ilaasortat nuimasut marluk aamma Naalakkersuisut kajumissaarpaat aatsitassarsiorfinnik piaarnerusumik ammaasariaqarnerit aqqutissiuuttariaqaraat, nunap pisuussutai iluanaarutaaniassammata.
- Timitaqanngitsunik aatsitassarsiorniartuarnerup oqallisigineqarnera naammappoq iliuuseqarneq amingaataavoq, Jens Immanuelsen Karl-Kristian Kruse-lu erseqqissaapput.
Siumumilu aqutsineq silinnerusoq ataatsimoorfiunerusorlu ujartorpaat, nunarput inuilu pillugit nammassinnaasaannik aqqutissiuussiniarnermi aqqutissat annerit ilagimmassuk inuiaat ataasiusut nunarpullu ataatsimoorfiusoq, Siumut sinnerlugu inatsisartuni ilaasortat Jens Immanuelsen aamma partiip politikkikkut oqaaseqartartua Karl-Kristianse Kruse tusagassiuutinut nalunaaruteqarlutik taama allapput.