Sisimiuni Arctic Sounds festivalertoqalerpoq

- Festivalertitsinissaq sivisuumik pilersaarusiorsimavarput. Isumaqarpugullu nuannissaqisoq nipilersortartut Sisimiuni takorpiarneq ajukkagut takussallutigit. Nipilersortussat ilaat tusaamasaapput, ilaallu aallarterlaajussallutik, Festivalertitsinissamut pilersaarusiortoq Jacob Froberg oqarpoq.

Nipilersoqataasussat ilaatigut tassaapput G-60, Small Time Giants Simon Lyngelu. Allallu nipilersoqatigiit 14-nit peqataassallutik. Nipilersortussat Kulturip illorsuaani Taseralimmi, timersortarfimmi, hotelimi kiisalu tupersuarmi nipilersortassapput.

- Nipilersortartut assigiinngitsut naapitakka Sisimiuni nipilersornermik festivalimut peqataanissaminnut soqutiginnipput. Soorlu Small Times Giantikkut, Simon Lynge allalllu, Jacob Froberg oqarpoq.

Arctic Sounds festivalernissap allaanerussutigaa nutaartaralugulu nipilersortartut nipilersortalerlaallu tusarnaartitsinnginnermi ataatsimoorlutik nipilersornissamut piareersarnissaat.

- Festivali aallartillugu erinnanik nutaanik nipilersugassiortoqassaaq, erinnallu nutaat tusarneqarnikuunngitsut saqqummiunneqassallutik. Taakkua ulluni pingasuni festivalip ingerlannerani saqqummiunneqassapput.

Jacob Froberg Sisimiuni nipilersornermik ilinniarfimmi aqutsisuuvoq, neriuutigaalu nunatsinniit, nunanillu allaneersut Sisimiuni 17-it sinnerlugit tusarnaartitseqattaarnerat ornigarluarneqarumaartoq. Nipilersortartut nunatsinniti peqataasut saniatigut aamma Sverigimiit, Islandimiit USA-miillu peqasaasoqassaaq.

Sisimiuni upernariartornera takutikkusuppaat. Isumaqarporlu påskereerpat nipilersortussat tusarnaariartussallu tikinnissaat tamatumunnga naleqquttuussasoq.

- Festivali påskereerpat aallartissaaq. Isumaqaratta piffissammi tassani pinngortitaq kusanartartoq, inuillu Sisimiunilu pinngortitap qanoq kusanartiginera takusariaqaraat isumaqarpugut, Jacob Froberg oqarpoq.

Arctic Sounds Festivalimi nipilersortussat aningaasaliisunit akilerneqassapput, angalanissarlu nammineq isumagisussaallugu.
- Festivalernermi kulturikkut pikialaarpalaaq eqqumiitsuliornerlu misigineqassapput, aamma ulluni pingasuni nuannisaqatigiinneq misigineqarsinnaassaaq, Jacob Froberg oqarpoq.

17-it sinnerlugit tusarnaartitsisarnissat apriilip ulluisa 25-anniit 27-ata tungaanut Sisimiuni tusarnaarneqarsinnaassapput.