Sisimiormiut: Inuinuku saarngi?

Sisimiuni ilivitoqaqarfiup eqqaarannguani ruujorinik ikkussuinermi assaasoqarnerani saanikunik amerlasuunik naammattuuisoqarpoq. Inuup saanerinerai Sisimiuni innuttaasut ernummatigaat.
Allattoq Dorthea Johansen
juulip 31-at 2014 08:51

Ernummatissaqanngillalli, taakku saarngit amerlasuut uumasut saarngerigai, Sisimiuni Katersugaasiviup, Nuummilu Nunatta Katersugaasiviata oqaatigaat.

- Innuttaasumiit saaffigineqarpugut lokalradiup tunuani assaanermi saanikunik amerlasuunik nassaartoqarsimasoq. Suleqatiga Kristian ilagalugu taakkua saanikut alakkarpagut, misissorlugillu nalilersorpagut. Puisit tuttut uumasullu allat saarngerigai oqaatigisinnaavarput, Sisimiut katersugaasiviani pisortaq Kristine Løventoft oqarpoq.

Saanikut illoqarfiup nutaanngitsup eqqaarannguani nassaarineqarput
Ilivitoqaqarfiup eqqaarannguani ruujorilersuinermi assaasoqarnerani saanikunik amerlasuunik nassaartoqarpoq. Saanikut nassaarineqartut ilivitoqaqarfiup nutaanngitsup eqqaarannguani nassaarineqartut innuttaasunik aalassatitsipput. Soorlu tassanerpiaq taamak saanikunik amerlatigisunik peqarnersoq Kristine Løventoftip nassuiaatissaqartippaa. 

- Qanga siuligut taassuma eqqaani najugaqarnikuupput, taava ilimanarluinnarpoq tassunga uumasut saarngi sinnikullu iginneqartarnikuusimassasut. Aamma ilimananngilaq tassani eqqaavigineqartartumi inunnik ilisisoqartarsimassasoq. Taamaammat inuup saanerinerai innuttaasut ernummatigisariaqanngilaat, Kristina Løvetoft nassuiaavoq.

Narkorsanit itsarnisarsiuunillu misissorneqanngillat
Taanna aperaarput ilumut uumasut saarngerinerai qulakkeerniarlugu sooq itinerusumik nakorsanut itsarnisarsiuunulluunniit misissorneqannginnersut.  

- Naliliigallarneruvoq, kisianni katersugaasivimmi ikiorterput uumasut saarngiinik ilisimaqartorujussuuvoq, ilisarinnilluarsinnaallunilu. Saarngit takusani tamangajammik ilisiarisinnaavai. Taakkulu tassa puisip, tuttut, qimmit, timmissat, aarrit saarngerivai. Ikiortitta naliliineri tatigivakka, takusakkalu aamma upperaakka, Sisimiut Katersugaasiviani pisortaq Kristine Løventoft oqarpoq.

Nuummi Nunatta Katersugaasiani pisortap tullersortaata Georg Nyegaardip, Sisimiut katersugaasiviani pisortap naliliinera taperserpaa. Oqarluni saarngit takusani tamangajammik puisip saarngerigai, ilaalu tuttup saarngerigai.